MNF MLA-te resolution thehluh mak an ti

MNF MLA-te resolution thehluh mak an ti
Assembly Session neih mekah State University kaihhnawiha MNF MLA-te private member resolution thehluh chu mak an tih thu Chhimbial Chhantu chuan an sawi.
Chhimbial Chhantu thuchhuak chuan, Mizoram Legislative Assembly 9-na thutkhawm vawi 6-na neih mekah ‘The Mizoram State University Amendment Bill 2026’ pass a ni chu lawmawm a tih thu a sawi a. He bill pass a nih theihna atana hma latu Mizoram State University Demand Committee Lunglei leh Lunglei MLA pali bakah chief minister leh Higher & Technical Education minister Dr Vanlalthlana te chungah a lawm tih a sawi a ni.
He bill puluttu Dr. Vanlalthlana’n State University-in a huam tel tur (cluster of colleges) zingah Mizoram Engineering College leh Lunglei Government College an tel dawn tih a sawi chu lawmawm a tih rualin, zirna in dang – Govt J Buana College leh DIET Lunglei an la tel ve loh avangin, a rang thei ang bera cluster of colleges zinga telh an nih theihnan Mizoram sawrkar a ngen tih a sawi bawk.
Budget Session-ah ‘Mizoram State University Headquarters Aizawla awm tura Mizoram Assembly-in a pass tawh hi kaltlangpui nise, hemi rual hian Chhim bial mipui duhdan leh beisei ang ngeiin State University dang, Lungleia Headquarters awm tur din ni bawk rawh se” tih MNF MLA-ten Private Member Resolution an thehlut chu mak a tiin pawi a tih thu Chhimbial Chhantu hian sawiin, ‘State University pahnih din chu state pachhia, Mizoram tan thil theih a ni lo tih tute pawhin an hriatchian em em lai a, MNF MLA-ten State University pahnih din an rawt hi chhimbial mipui an duhsak loh zia lanchianna leh Lungleia State University din tur sawihnawmnaah kan ngai,’ a ti.
Lungleia State University din tur chu Lunglei leh chhim lam mipui ta bik chauh ni loin, Mizoram pumpui ta tur a ni tih Zoram mipuiin hrethiam se a duh tih a sawi a. Mizoram zimteah hmasawnna rualkhai awm se, hmasawnna ruhrel leh thil dang pawh, hmun khata dahkhawm zel loin semzai ni thin se tih chu an duhdan a ni tih a sawi.