Thin tana chaw tha

Mihring kawchhunga taksa peng hrang hrang zinga lian ber chu thin (liver) a ni a, thin hian hna chi hrang hrang 500 chuang a thawk niin mithiam ten an sawi a, taksa hriselna atan thin hrisel neih a pawimawh hle a ni. Mahse, tunlaiah thin lam natna a tam ta hle mai a, kan khawsak dan, awm âwl leh hmuihmer ei nasat lutuk te hi thin lam natna lo pun nasatna chhan pakhat niin mithiam ten an sawi.
Hetiang karah hian thin hrisel kan neih theih nana thlai ei tur tha ni a Florida-a cheng, gastroenterologist Dr. Joseph Salhab-a thu leh hla, Times of India-in an tarlan kan rawn chhuah chhawng e.
1. Broccoli: Dr. Salhab-a list-a hmasa ber chu kan ramah pawh kan hriat lar tak broccoli a ni. Cruciferous vegetables an tih, broccoli ang chi te hi thin vengtu tha tak an ni. Broccoli-ah hian sulforaphanes a tam a, chu chu thin hriselna atana chaw tha tak a ni a, thin detox-na tha tak a ni. 2015-a zirchianna neitu ten an zirchhuah pakhat chu broccoli sprout extract-in mipa fatty liver neiah ALT leh gamma-glutamyl transpeptidase level a tihniam thei a, chu chu thin hnathawh tithatu a ni. Hetihrual hian broccoli ngaina lo tan pawh cruciferous vegetables dang- brussels sprouts (zikhlum te chi), zikhlum, parbawr, collard greens (tamthing), kale (antam hnah kir deuh chiat), leh turnip (bulbawk sen) te pawh thin tan chaw tha a ni.
2. Beetroot: Beetroot-ah ian betalains a awm a, betalains hi beetroot tisen-tu (reddish-purplish) a ni a, thin a oxidative stress a tihniam thei a, thin tha lo pawh lo insiamtha leh thei tura pui theitu a ni. Beetroot hi fatty liver bakah thin lam natna chi hrang hrang nei tan chaw tha tak a ni. 2023-a meta-analysis a an hmuh dan chuan beetroot juice supplement hian liver enzymes alanine aminatransferase (ALT) a tihniam thei a, aspartate aminatransferase (AST) a tihniam thei bawk. He thlai hi thin tha lo nasa deuh tawh, hepatic steatosis tan pawh a tha. Beetroot-ah hian folate leh manganese a tam a, hei pawh hi thin a metabolic process tichaktu a ni bawk. Beetroot chu a tui sawr emaw a tak ei emaw a tha ve ve.
3. Artichokes: Artichokes hi kan ramah kan ei vak lo a nih hmel a, chutihrualin thin tha lo tana chaw tha tak a ni a, Dr. Salhab chuan thin hrisel nana chawtha ber te zinga mi a tihial a ni. Cyanurin a pai tam a, chu chu thin tan antioxidant chak tak a ni. He antioxidant hian thin cell te chu insiamtha turin a pui a, bile production a pui bawk a, chu chuan thau a tikehsawn a, thin atangin toxin a tifai thei a ni.