Roreltute fimkhur se

Kan ram rorel khawlah Budget Session an nei mek a, hmun hrang hrangah titi a tling a, mipuiin an ngaihven a, kan tuipui tlang viau a ni.
90s vel atang daih tawh khan Mizoram Assembly-a ro an rel lai hi TV-ah a en theih thin a, live telecast ngata en theih a ni thin. Youtube a lo chhuak a, youtube lamah a en theih leh a, Budget Session neih mek pawh hi mipuiin TV leh youtube atangin an thlir thup a ni.
Kan ram roreltute’n ro an rel lai mipuiin kan thlir thup a, zirlaite pawhin an en a, kum lama la naupang zawkte pawhin an en a, a vai vaia en lote pawhin social media lama tawi te te tal chu an en fur ang. Chutiang chu a nih avangin mipuite rilruah kan ram hruaitute hian thudik emaw thudik ni lo emaw an tuh thei a, nungchang mawi leh nungchang mawi lo pawh an tuh thei ang.
Session-a kan ram hruaitute chet dan leh thil an sawi dan hi a tha lo a nih chuan mipui rilruah a tha lo zawngin nghawng a nei thei a, a bikin naupang leh tleirawlteah phei chuan ram hruaitute awm dan tur nia an hriat kha a tha lo lam a ni daih thei ang. Chutiang bawkin an chet dan a mawiin an thil sawite pawh a tha a nih chuan mipuiah nghawng tha tak a nei ang a, ram leh hnam tan thil lawmawm tak a tling ang.
House chhungah awm dan mawi ka vawng em tih te, inbuatsaih lovin thil pawimawhah ka tel em tih te ngaihtuah ran reng se, mipui rilru ka hruai kawi ang tih te hlau chungin Assembly House chhungah hian awm se, Session kalphung leh House inkaihhruaina hre lo zetin ka awm ang tih te hlau se, kawng dikah mipui hruai tumin theihtawp chhuah se, uluk taka inzirin inbuatsaih se, chu chuan rah tha a chhuah ngei ang.
Mipui nawlpuiin Session kan en a; film tha lovin mi a hruai sual thei a, film thain mi a hruai tha thei ang hi a ni ang, Session hian a chhe lam a tha lamin mipui rilru a hruai thei ang tih a rinawm a ni.