Tribal Power featuring Mimi Renthlei, Lilac & Jaui ‘Bukna Dik’

Tribal Power hla ‘Bukna Dik’ featuring Mimi Renthlei, Lilac & Jaui chu a music video an peih fel ta a, tunkarah hian en theih turin an dah chhuak hman tawhin a rinawm. He music video hi March ni 20-21 chhunga Lammual-a neih tur “Tribal Power Music Fest (Bukna Dik)” nena inphaman a, boruak lo neih hmasak nana an tih deuh a ni pakhat.
‘Bukna Dik’ hla hi Tribal Power frontman OPA phuah niin, a bridge-ah Lilac-in tlar hnih vel a phuah belh bawk. He hlaah ian guitarist ZTP-A, Samuel-a (The Prophets, Keyboardist), PB Liansanga (Magdalene), Sangkima (drummer), VL-a (guitar), OPA (vocals) leh Mini Renthlei, Lilac leh Jaui te an thawkho a ni.
‘Tribal Power Music Fest (Bukna Dik)’ hi a ni khatna March ni 20-ah hian chhun lamah Tribal Power hla panga (5) leh an duhzawng hla pakhat (1) hmangin University & College Beat Contest buatsaih tum a ni a, zan lamah band leh mimal zaithiamte’n concert an nei zui ang. A ni hnihna, March ni 21 (Inrinni) chhun lamah Beat Contest Grand Finale neih a ni anga, zanah band leh mimal zaithiam hrang hrang bakah main band Tribal Power te an zai dawn a ni.
Entry Ticket Rs.100 man a ni dawn a, entry ticket hi lucky ticket a ni nghal dawn a, a vannei berin scooter a man anga, hei bakah hian mi vannei 20 tan consolation prize siam a ni a, thla khat chhung, April ni 1, 2026 atanga May ni 1, 2026 thleng chu H&B Water Park free entry ticket an dawng dawn a ni. Ticket atanga sum lut hi hospital hrang hrang, thlan bikah Poor Fund atan chhun luh tur a ni.