Zirlai pawl-ten 8th Schedule-a telh an remtih thu an sawi lo

Zirlai pawl-ten 8th Schedule-a
telh an remtih thu an sawi lo
Eighth Schedule-a Mizo tawng telh chungchangah Mizo Language Development Board-in sawrkarah thu dik lo an report niin zirlai pawl chuan an sawi a. Eighth Schedule-a luh dil chu tun dinhmunah chuan hun rih lo an tih thu an sawi.
MZP Gen. Hqrs. leh Hnam Pual Zirlai Pawl chuan Assembly Session neih meka hemi chungchang putluhnaah Education minister-in 8th Schedule-a Mizo tawng telh duh zinga a sawilan zirlai pawlte chuan an duh lo zawk a, sawipuitu Mizo Language Development Board (MLDB) hnuaia din Eight Schedule Study Group nen chuan an inkawm ngei a, an inkawmnaa thu chhinchhiah (meeting minute) leh sawrkara an thu thehluh (report) a inang lo tih an sawi.
“Heng thutkhawmah hian MZP emaw Hnampual Zirlai Pawl hian 8th Schedule-a Mizo tawng dah hi kan pawmpui thu emaw remtihna emaw kan sawi chhuak loa, session neih meka Education minister leh chief minister-ten MZP leh hnampual zirlai pawl-in kan pawmpui nia sawi hi MLDB hnuaia din Eight Schedule Study Group hian sawrkar hnenah thudik tawk lo an thlen (report) niin kan ngai,” MZP president Dr C Lalremruata chuan a ti.
8th Schedule chungchanga hmalaknaah hman atanga MZP leh Hnampual zirlai hruaitute ngaihdan a la ngai reng a, Zofa zawng zawng Mizoa lungrual taka kan luankhawm theih hun an nghahhlelin an duhthusam a ni tih an sawi a. ‘Lusei tawng’ tih chu hman tlanglawn ber ni mah se, inlungrual hun nghah a la ngai tih sawiin, “8th Schedule-a Mizo tawng dah hi duh loh hlawm tawp kan niloa, Zofa hnam hrang hrang inpumkhatna tura hma laknaah Mizo tawng kan tih hian khawi bik hi nge, tute tawng ber nge tih kha zawhna a la ni. Mahnia hnam bil tawng hrang theuh nei kan ni a, tu tawng chin nge kan dah ang. Lusei tawng hi Pathianin kan zavaia tawng intawm atan min pek a ni tih chu kan ring a, chutih laiin tu tawng ber nge kan dah ang tih a la chiang lo. Kan pawm tlan hunah chuan dah a nih theihna tura a nawr na ber kan ni ang,” an ti.