Sikul bungraw hlui pek leh lak chhawn theihna tur kalpui mek

Sikul bungraw hlui pek leh lak
chhawn theihna tur kalpui mek
Urban Development & Poverty Alleviation department buatsaih “Sikul Bungraw Inthleng Runpui – Swap and Save Campaign” chu UD&PA commissioner & secretary Lalmalsawma Pachuau chuan Thawhtanni khan Aizawlah a hawng.
UD&PA commissioner chuan ‘Swap and Save Campaign’ chu an department hnathawh hrang hrang karah Urban Development leh Poverty Alleviation intawhna tak niin, faina lama hmasawnna pakhat, mirethei zawkten an chhawr theih tur a ni tih a sawi a. Mipuiin awlsam taka thil tha kan tih theih tur department-in a chhawp chhuak chu a lawmawm tih a sawi a ni.
Nikuma a vawikhatna atana Swap and Save Campaign an kalpui chu a hlawhtling hle tih sawiin, nikuma bungraw lut zat let vel target-a neih a, district lam nen thawhhona tha zawk neih a pawimawh tih a sawi. A mamawhtuten bungrua an lam theihna tur, hmun hrang hranga 3R Centre leh a buaipui tur self help group-te UD&PA hnuaia an lo awm sa chu hmalakna tichaktu a ni thei dawn tih a sawi bawk.
Kum 2025 khan Swap and Save Campaign hi Aizawl veng pasarih leh district headquarters tinah neih niin, campaign neih chhunga bungraw lut zawng zawng chu 20386 a ni a, chhuak zat 12596 a ni.
March 9-21 chhungin he campaign hi kalpui a ni anga, Centre hi Aizawl khawpuia veng 8-ah leh district headquarters tinah hawn a ni. He Centre hi zirlai naupang session thar kai mai turten an zirlaibu hman tawh loh, uniform hak tawh loh leh zirlai kaihhnawih (school items) an donate theihnan leh, a la hmang tangkai turten an hman nawn leh theihnan awlsam zawk leh a thlawna an lak theihna tur hmun a ni.
Sikul bungraw inthleng runpui hi sikul bungraw hluihlawn tawh, bawlhhlawh chang mai turin a hmang tangkai turte hnen a thlen theihna atan kawng tha tak, bawlhhlawh tihtlem kawngah pawh hmasawnna tha tak a ni tih sawi a ni.