BP sang tana minute 2 exercise \ha chi

BP sang tana minute 2 exercise tha chi
BP sang kan ti a, hypertension an ti bawk a, khawvel huapin BP sanga avanga harsatna nei hi kan pung chak hle a, inenkawl loh chuan taksa hriselna kawngah harsatna nasa zawk kan tawh phah thei. BP sang enkawl nan hian kan nitin khawsak phung tihdanglam deuh a, ei leh in fimkhur a, exercise lak that te a pawimawh. Chutiang karah chuan minute 2 vel bawr chauh exercise lak a, BP tana tha riau si a awm niin an sawi tlat mai.
British Journal of Sports Medicine-in an tarlang danin, exercise lak dan chi khat, ho ang reng, tha fû si a awm a, chu chu ‘wall sit’ an ti a, chair-a thu angin boruak-ah thut a, bang nghen tur a ni. Kaihzaah right angle (90 degree) a tithlepin, bang nghengin thut tur a ni. Hetiang exercise hian circulation a siamtha a, tihrawl a tichak a, chu chu BP sang tihhniam nan a tha hle. Nitin ‘wall sit’ minute 2 vel tih thin hi kan hriat loh karin lung hriselna atan a lo tangkai thei dawn hle a ni.
Wall sit chu isometric exercise niin, sawi tawh angin, bang nghengin, kaihza 90 degree a tithlepin, bang nghengin boruak-ah thut tur a ni a, hetiang position-a awm rei tur hian tihrawl a tang tha duh hle a ni. Tihrawl a titan nasat avangin a hlim chhawnah chuan BP a sang ang a, mahse, a rebound effect-ah BP a tihniam dawn zawk a ni.
Hetiang wall sit exercise hi minute 2 vel tih tum la, chutah muang changin ding chhuak la, rei vak lo i chawlh hnuah han tinawn leh la, minute 2 vel bawk i ti leh ang. Chutiang chuan set thum vel tih tum la, nitin i tih theih chuan a tha a, kar khatah vawi thum tal tih tum ang che. Wall sit hi kum upa tawh deuh tan pawh tih theih a ni a, khup leh hnungzang na nei tan pawh tih theih vek a ni.
Wall sit hi a tha an tih rualin thildang nena a kalkawp tho a pawimawh a, exercise dang- walking, cycling, swimming etc te tih tel tho a tha a, ei leh inah pawh balance diet ei tum a pawimawh a, thei rah leh thlai hnah ei tamin, thau leh mawm bakah al ei tlem tur a ni.