Hmeichhiate thubuai ngaihtuah sak

Hmeichhiate thubuai ngaihtuah sak
Hmeichhiaten ‘hmeichhia’ an nih avanga harsatna an tawhna an thlen angin International Women’s Day denchhenin ngaihtuah sak a ni a, a theih ang ang chinfel a ni.
International Women’s Day (IWD) 2026 denchhen hian Mizoram State Commission for Women leh district lama heti lam kaihhnawihte thawhpuiin hmeichhiate chawikanna tur ‘Mahila Jan Sunwai’ (Free Legal Public Hearing) hun hawn a ni a. District tam zawk chuan Thawhlehni khan an hmang.
Serchhip-ah chuan hmeichhe panga complaint dawn a ni a, an case hi hmun leh hmuna chinfel nghal theih a nih loh avangin police, District Legal Service Authority leh One Stop Centre lamah refer an ni. Complaint tam zawk hi hmeichhiate dikna chanvo rahbeh sakna, chhawmdawlna dawn tur ang dawnglo, ro khawm chungchanga buaina leh fa enkawl inchuh chungchang an ni.
District dang – Champhai, Kolasib, Saitual, Lawngtlai, Siaha leh Mamitah pawh free legal public hearing-ah hian hmeichhiate chuan heng thubuai – thuam chhawm chungchang, inchhungkhura hleilenna, hnathawhna hmuna innghaisakna, sawrkar scheme hrang hranga an dikna chanvo hmuh loh, office hrang hranga ngaihsakna an dawn loh, fa enkawltu tur chungchang, leiba inrul duh lo, nupa inthen chungchang leh harsatna dang neiten an thlen a, an thubuai chinfel sak dan ngaihtuah ho a ni.
Mizoram State Women Commission chairperson C Zodinpuii chuan, hleilenna tuar hmeichhiaten Aizawl an pan kher ngai loin district tinah bawrhsap kaihhruaiin Commission member te, Legal Services Authority, CDPO, DPO, DCPO, Police nen tanghoin International Women’s Day denchhenin March 9-13 chhung hian Mahila Jan Sunwai neih a ni tih a sawi.
MSCW member Dr Hmingthanzuali sawi danin, State Commission for Women hian hmeichhiate harsatna sutkian chu a tum ber a ni a, kum 2025 atanga vawiin thengin Commission hnuaiah hian case 143 a lut tawh a ni.