Oscars 2026-ah One Battle After Another leh Sinners an langsar

Oscars 2026-ah One Battle After Another leh Sinners an langsar
Lemchan lama chawimawina sang bera khawvelin a neih Academy Awards, Oscars an tih bawk chu kumin atan an rama Pathianni zan, keini tana Thawhtanni tuk khan Dolby Theatre, Hollywood-ah an sem leh ta, tunlai lemchan khawvela milar te an punkhawm zanah hian ‘One Battle After Another’-in award paruk dawngin a langsar ber a, award ngaihhlut ber Best Picture a dawn bakah he film avang hian Sean Penn chuan Actor in a Supporting Role a dawng a, Paul Thomas-a’n Director award a dawng tel bawk.
‘Sinners’-in award pali dawngin, a dawng tam ber dawttu a ni a, he film changtupa Michael B Jordan chuan Actor in a Leading Role a dawng, Original Screenplay, Original Score leh Cinematograpy a dawng tel bawk. ‘Sinners’ hi ‘Frankenstein’-in dawttin, award pathum a dawng a, ‘KPop Demon Hunters’-in award pahnih a dawng bawk.
Actor in a Leading Role-ah hian ‘Marty Supreme’ changtupa Timothee Chalamet chu award dawng tura rinkai niin, Golden Globes leh Critics Choice Awards te pawh a lo dawng taw a, mahse, Oscar-ah Sinners changtupa Michael B. Jordan-a’n award a dawng ta zawk. Sinners hian Autumn Durald Arkapaw chuan Cinematography a dawng a, mihang zinga he category-a award dawng hmasa ber a ni.
Kumin Oscars-ah hian thil la thleng ngai lo thleng thar a awm nual a, ‘Hamnet’ changtunu Jessie Buckley chuan Actress in a Leading Role a dawng a, Irish actress zinga he category-a award dawng thei hmasa ber a ni a, hetihrual hian ‘Weapons’ avangin Amy Madigan chuan Actress in a Supporting Role a dawng a, ani hi 1986 khan ‘Twice in a Lifetime’ avangin Oscar-ah nominate a lo ni tawh a, Oscar nomination a lan hmasak ber atanga award dawn inkar hla ber record a siam ve bawk.
KPop Demon Hunters soundtrack ‘Golden’ chuan Best Original Song a dawng a, Kpop hla he award dawng thei hmasa ber a ni a, Best International Film chu Norway lam film Sentimental Value-in dawngin, Norway-in he category-a award a dawn vawi khatna a ni bawk.
One Battle After Another avangin Sean Penn chuan Actor in a Supporting Role a dawng a, award semnaah hian a inlan lo nain, ani hi mipa actor zingah acting category-a Oscar pathum chin dawng thei palina a ni a, Daniel Day-Lewis, Jack Nicholson leh Walter Brennan te nan pathum theuh an dawng tling ta a ni.

Jessie Buckley
2026 Oscars winners:
Best Picture : One Battle After Another
Actress in a Leading Role : Jessie Buckley – Hamnet
Actor in a Leading Role : Michael B. Jordan – Sinners
Actress in a Supporting Role : Amy Madigan – Weapons
Actor in a Supporting Role : Sean Penn – One Battle After Another
Director : Paul Thomas Anderson – One Battle After Another
Original Screenplay : Sinners
Costume Design : Frankenstein
Original Song : “Golden” from KPop Deamon Hunters
International Feature Film : Sentimental Value (Norway)
Live Action Short Film (tie): The Singers & Two People Exchanging Saliva
Documentary Short Film : All the Empty Rooms
Original Score : Sinners
Visual Effects : Avatar: Fire and Ash
Cinematography : Sinners
Film Editing : One Battle After Another
Production Design : Frankenstein
Adapted Screenplay : One Battle After Another
Documentary Feature Film : Mr. Nobody Against Putin
Casting : One Battle After Another
Animated Short Film : The Girl Who Cried Pearls
Makeup & Hairstyling : Frankenstein
Animated Feature Film : Kpop Demon Hunters
Sound : F1