AR ram chei \hatna bul \an a ni ta hi….

A lawmawm e. Kum 50 chuang political party hrang hrang ten election auhla-a an lo au chhuahpui thin, “Aizawl khawpui laili taka awm Assam Rifles sawn chhuah” chu a takin a thleng a, a kalkawng a thuiin a rei ngar ngar hle a, tun dinhmun a lo thlen dan hi hmun zimteah tarlan sen a ni lo.
Chuvangin, a kaihtawiin, March ni 15, 2025-ah official-in Mizoram sorkarah hlan a ni a; a kum khatna chamah a chei tharna hna kutthlak tan niin, nimin March ni 17 khan chief minister Lalduhoma chuan hnathawh bul tanna lungphum a phum fel a.
Heti hian, political party-te pawhin political advantage atana hman zui tum tawh lovin, eng eng emaw thu mu hnu kai tho tawh lo se. Thudik tak chu, sawrkar hmasaten theihtawp an chhuah vek; a tawpah tuna sawrkar mek hun laiin a hlawhtlinna hmuh a ni; chu zawng chu a ni e.
Master Plan area hi hectare 17-a zau a ni a, a ram len zawng atanga 39.33% -ah mipui mamawh, kawngpui, building, etc.. din thar a ni ang a, a bak 60.67% chu hmun hring atana ruahman a ni. A tha thawkhat e.
Master Plan ang chuan, infrastructure hrang hrang din nan hian cheng vaibelchhe 62.35 chu tun maia hriat theih chin a ni a, chungte chu : Heritage Court -Rs.13.18 Cr; Widening of roads- Rs. 23 Cr; 33 Kv Sub-Station -Rs 22.35 Cr; PHED Reservoir -Rs. 4 Cr. te a ni.
Heng bakah hian Vanapa Hall, 2000 seats (bakah a chhunga awm tur auditorium 500 seats; Lecture Hall 100 seats; Board Room 50 seats; parking). Hei bakah hian police outpost, public park leh amphitheatre etc. te din a ni bawk ang a, heng atana sum senso tur hi tarlan a la ni lo a. AR ram chei that nan hian cheng vaibelchhe za chuang chu senral a ni ngeiin a rinawm.
Tuna AR chhuahsan ram cheibawl hi a tul a, mipui mamawh tak pawh a ni e, hetiang kan nei thei tur hi a lawmawm, sawisel tur a ni lovang.
Chutih rual chuan, kan state economy dinhmun ngelnghehna tur lam hawia hma lakna lamah hian tih theih kan neih si, kan la tih loh hi eng eng te nge awm tia kil tin kan dap kual reng pawh hi a pawimawh hle. Chung zingah chuan, leilet siam theihna hmun zau tak kan neih, tun thlenga siam lohva dah tawl mai mai a la tam em em mai te hi, AR ram chei that kan phur ang bawk hian cheng vaibelchhe za tel sengin leilet te hi nawr chhuak ve zung zung bawk ila, kuthnathawktuten an thar chhuah tam poh leh an dinhmun a ngheh rualin state economy dinhmun pawh a kang ve zel mai dawn a ni.