Iran-in Pars gas field beih chhan let tumin vauna tichhuak

Iran-in Pars gas field beih chhan let tumin vauna tichhuak
US-Israel tangdunin Iranian energy hmunhma a kah hmasak ber nia sawiah Nilainia Pars gas field lian tak a beih chu Tehran chuan Gulf ram puma boruakalhthei leh tuialhthei hmunhmate beia a chhan let tur thu a puang ve nghel.
Pars field beih hnu hian tuialhthei man a sang nghal a. Indona avang hian khawvela energy thawnna kawng pawimawh tak khar a ni tawh a, tunah a Iran-a hmunhma beih leh hian harsatna rei tak daih a thlen theia ngaih a ni a. Benchmark Brent crude man hi 5% vela sangin $108 chung lam a ni nghal a, stock market-te a tlahniam hle bawk.
Pars hi khawvela natural gas deposit lian ber niin Gulf ram pumah Iran hian Qatar nen an insem a. Iran-a Fars news agency chuan boruakalhthei dahna (tank) leh thlitfimna hmun thenkhat kah chhiat a nih thu a tar lang a, thawktute chu hmun himah sawn an ni a, emergency crew-ten kangmei an thelh niin a tar lang a. A hnuah sorkar chanchinbu chuan kangmei hi thunun a ni tih a sawi bawk.
Israeli chanchinbute chuan he thil hi US remtihnain Israel-in a ti niin an tar lang nasa hle a; mahse, ram pahnihte hian an tihah an la chhal lo ve ve thung.
US tanrualpui hnai tak, he biala US airbase lian ber awmna, Qatar chuan US sawi ri lovin Israel beihah a puh nghal a. Foreign ministry thupuangtu chuan khawvel pum huapa energy indaih loh hlauhawma dah theihtu hlauhawm tak a nih thu a sawi a. UAE pawhin he beihna hi a dem hle bawk.
Iran chuan an energy hmun beih chhan let an tum thu sawi nghalin Saudi Arabia, UAE leh Qatar ta, an chhehvela tuialhthei leh boruakalhthei hmunhmate chu an bitum langsar turah an telh a. ‘Darkar rei lo te hnua kah a nih hmain’ chhuahsan turin an ti.
Chawlhkar thum dawn indona awm tawhah hian a hmain US leh Israel hian Gulf-a Iran-in energy a siamchhuahna hmunte chu an la bei ngai lo va, hei vang hian Iran pawhin an thenawm rama tuialhthei leh boruakalhthei hmunte beiin an ram beihna phuba lain a la che ngai lo.
Iran hian khawvela tuialhthei leh liquefied natural gas thawn chhuah 20% kalna kawng, Strait of Hormuz chu a lo khar tawh a, a hmangtu ramte chuan a siam chhuahna hmun khawih a nih loh avang hian kawng khar hi rei lo te chauh a nih an lo beisei thin a ni.
Iran-in Pars field beih chhang leta beih tuma a vaute hi Saudi Arabia-a Samref Refinery leh Jubail Petrochemical Complex, UAE-a Al Hosn Gas Field leh Qatar-a Mesaieed Petrochemical Complex, Mesaieed Holding Company leh Ras Laffan Refinery te a ni.