Barcelona an chak nuamsa

St James Park-a khel chhe tak Barcelona chu Nou Camp-ah tha chungchuang takin an khel a, an mikhual Newcastle United chu 7-2 ngawta sawpin Champions League quarter-final an lut. Barcelona rual hian Bayern Munich pawhin awlsam takin quarter-final an lut ve bawk.
Barca an chungnung
An mualah chak ngei tuma tan khawh Barcelona hian bul an tan tha viau a, goal pawh an thun hma hle. Inkhel tan atanga minute rukna lekah Raphinha chuan fuh takin a pet kual lut a, hmahruaina goal a thun. Hma takah goal thun bawk mah se an tlarhnung chet fuh tawk loh vangin goal an chhuah ve thuai tho. Newcastle United tan Anthony Elanga chuan minute 15-naah goal thunin an si phurh a sut.
Goal khat ve ve an thun hnuin Barca an che fuh hmasa leh a, Marc Bernal chun minute 18-naah hma an hruai letna goal a thun. Hma hruai nawn leh mah se Barca tlarhnung an che fuh lo nawn leh a, Newcastle United tan Anthony Elanga chuan minute 28-naah goal thunin an si phurh a sut nawn leh. 2-2 a nih hnuin inkhel a hmuhnawm zui viau a, goal pawh a lut ta lawk lo. Goal thun tuma tan khawh Barca an vannei a, penalty an hlawhchhuak. Raphinho penalty hlawhchhuah hi hmuhnawm taka inlan Lalime Yamal chuan minute 45+7-ah a pet goal a, 3-2 a hmahruai chungin chawlhlawk an hmang.
Chawlhlawk hnu lamah Barcelona an khel tha leh zual a, goal li ngawt thun belhin, goal an chhuah duh tawh lo. Barca tan hian Fermín López chuan minute 51-naah an goal lina thunin an hmahruaina a tizau a. Hemi hnu lawkah hian Robert Lewandowski chuan an goal ngana a thun zui leh zat bawk. Kum 37 leh ni 209-a upa Robert Lewandowski hian Lionel Messi record a khum a, UCL knock-out stage-a goal thun thei upa ber record thar a siam. Lewandoski goal thun hnu hian goal hmahruai thuntu Raphinha chuan an goal 7-na a thun zui leh bawk a. An mikhual Newcastle United chu 7-2 ngawtin an sawp a. Si belhkhawmah 8-2 a hnena changin quarter-final an lut. Quarter-final-ah Copa del Rey atanga hnawtchhuaktu Atletico Madrid an hmachhawn zui leh dawn a, chak ngei tumin tan an khawh nasa hle ngei ang.
Bayern an chak nawn leh
Inkhel dangah an mualah 6-1 ngawta lo chak tawh Bayern Munich chuan mikhual an nihna hmunah 4-1 ngawtin hnehna an chang leh a. Atalanta chu si belhkhawmah 10-2 ngawtin an sawp a, an phu ang ngeiin quarter-final an lut.