SZA-i’n RIAA Diamond certified hla 2 a nei ta

SZA-i’n RIAA Diamond certified hla 2 a nei ta
SZA chuan a vawi khat nan Recording Industry Association of America (RIAA)-in diamond certification a hlan theih hla a nei ta a, mahse, a rualin RIAA Diamond hla pahnih a nei nghal. RIAA Diamond certified hla chu USA-a hla maktaduai 10 hralh tlin theih chhinchhiahna a ni.
SZA hla pahnih ‘Kill Bill,’ leh ‘Snooze’ ten he mellung hi an thleng ve ve a, heng hla pahnih te hi Billboard Hot 100 (US singles) chart-ah No.1 leh No.2 an kai a, chart-ah ian kum khat chuang an lang ve ve bawk. A pahnih hian a studio album pahnihna ‘SOS’ ami ve ve an ni bawk.
SZA chuan Instagram lama he mellung avanga a lawmthu hi post-in, “F***ING CRAZY” a ti deuh tawp. SZA tan hian thu lawmawm a tam lah tak a, ‘Kill Bill’ leh ‘Snooze’ mai bakah a hla dang 27 te chuan RIAA certification an dawng thar bawk alawm! ‘SOS’ a hla 22 bakah SOS Deluxe: Lana reissue leh a studio album hmasa ber ‘Ctrl’ te chuan RIAA Platinum certification an dawng a, platinum certification hi US-a hla emaw album emaw maktaduai hralh tlin theih entirna a ni. Hei bakah hian a hla dang panga chuan RIAA Gold certification an dawng a, hei hi chu US-a 5,00,000 hralh tlin theih chhinchhiahna a ni ve thung. Heti hian SZA hian RIAA certification nei phak record 60 chuang a nei tling ta a ni.
SZA hi rimawi khawvela a rawn intar chhuah hnuah Billboard chart lamah a chetha nghal hle a, Hot 100 chart a No,1 kai thei hla pathum nei tawh a, top 10-a lang thei hla 12 a nei tawh a, he chart-a lang thei hla 60 a nei tling tawh bawk. Rimawi khawvelah hian 2017-a a album hmasa ber ‘Ctrl’ a tlangzarh atangin a rawn inhnim thuk ngal hle a ni.