Modi-a’n Iranian president tuikawng himna sawipui leh

Iran-in Strait of Hormuz a khar chhunzawm zel karah Prime Minister Narendra Modi-a chuan an ram president, Masoud Pezeshkian-a biain tuikawng pawimawh a zalenna humhalh a pawimawh thu a hrilh nawn leh.
Israel-in Iran gas field lian ber, South Pars a beih hnu leh phuba lak nana Qatar-a Ras Laffan LNG complex a beih ve hnuah prime minister chuan hmunhma pawimawhte beih tha a tih loh thu a sawi a. Hetiang hian nghehna a tichhe a, mamawh inpekna pawimawh tak tak a tibuai tih a sawi.
Modi-a chuan, “President Dr. Masoud Pezeshkian nen kan inbia a, Eid leh Nowruz chibai bukna kan hlan bawk. He kût hun hian Asia khawthlangah remna, muanna leh hausakna a thlen ngei kan beisei. He biala hmunhma pawimawh tak takte beihna chu kan dem a, hei hian a chhehvem himna a tichhia a, khawvela mamawh inpekna a tibuai a ni,” tiin X-ah Inrinni khan a tar lang.
Modi-a chuan zalen taka lawng kawngpui hawn leh him taka a awm reng a pawimawh thu a sawi nawn leh a, Iran-in an rama Indian-te himna a ngaihtuah chhunzawm zel chu lawmawm a tih thu a sawi bawk.
Khawvel puma tuialhthei leh boruakalhthei thawn chhuah zinga 20% vel chu Oman leh Iran inkar tuipui, Strait of Hormuz kaltlang a ni a. India-in tuialhthei a lak luh 40% vel, liquefied natural gas (LNG) a lak luh 50% aia tam leh LPG a lakluh tam zawk hi he kawng hmanga a lak a ni.
Inbiakna chungchanga thuchhuah siamin India-a Iran embassy chuan Pezeshkian-a chuan Iran-in indona a tan loh thu a sawi uar hle niin a tar lang a. India chu BRICS-a president a nih mek angin an pawl hi ‘Iran laka beihpui thlakna tihtawp leh an chhehvel leh khawvel pum muanna vawnna kawngah’ tih theih a neih ti turin a ngen.
Embassy chuan, “Khawvel hruaitu hrang hrangte nena inrawnkhawmna leh sawihona a neihte sawiin Prime Minister Modi-a hian indona kawng zawh chu tumah thatna tur a ni lo tih a sawi uar hle a; chuvangin, tute lam pawh inbengdai turin a duh,” a ti.
Sorkar laipui chuan Inrinni khan ram chhungah petrol leh diesel a tam tawk thu a sawi a, thlifimtuten LPG an siam chhuah a pun thu a sawi bawk.
Petroleum & natural gas ministry chuan Free Trade LPG (FTL) cylinder kg 5-a rit chu mahni state lova inhlawha awmte tan siam a nih tur thu a puang bawk.
March 12-a khan Modi-a hian Pezeshkian-a hi a lo be tawh a, hemi tum hian prime minister hian Middle East-a thil awm dan chu a ngaihtuah thui hle tih a hrilh a, energy inpeknate chu ‘tuma tihbuai lohva’ kalpui a nih theih nan a ngen bawk.
“India mipuite himna bakah bungrua leh energy kalpuina dal lova tluang taka a kal theih chu India ngaih pawimawh ber a ni reng a. Remna leh muanna a awm theihna tura India-in tih theih a neihah inpek a theih thu a sawi a, inbiakna leh inpalai tawnna neih a that thu a sawi a ni,” tiin Modi-a hian a biak zawhah a lo sawi tawh a ni.