ASSAM INTHLAN: Party panga thawhpui Cong-in bial 100 chuh dawn

ASSAM INTHLAN: Party panga thawhpui Cong-in bial 100 chuh dawn
Assam Congress chief Gaurav Gogoi-a chuan an state assembly inthlan lo awm tur chu party panga dang nen tangrualin an bei mek tih sawiin an party chuan bial 100-ah candidate an nei dawn tih a sawi.
BJP duh lotute vote chu a inthen loh a beisei thu leh Himanta Biswa Sarma kaihhruai sorkar chu an paih thlak ngei a beisei thu a sawi bawk.
Gogoi-a hian Inrinni khan ANI hnenah Congress chuan an state chhunga bial 126 awmah 100-ah an chuh dawn tih a sawi a. “Assam-ah hian eptu party paruk – Congress, Assam Jatiya Parishad, Raijor Dal, CPI(M), CPI(ML) leh All Party Hill Leaders Conference-te thawhdunna a awm a, Assam Congress-in bial 100-ah candidate an siam ang… BJP duh lotute vote a inthen lo vang a, Himanta Biswa Sarma kaihhruai sorkar chu kan paih ang tih kan beisei a ni,” a ti.
Congress hian Zirtawpni khan candidate pasarih awmna list palina a tichhuak leh bawk a, bial 126 awmnaah hian an candidate tur 94 an puang ta a ni.
Candidate list tihchhuah tharah hian kum 2024-a a chhuahsan Jayanta Borah, Congress thupuangtu Bidisha Neog, Youth Congress hruaitu Rohit Pariga, thupuangtu Joy Prakash Das, Gyandip Mohan, Pran Kurmi leh Rahul Roy te an tel.
Congress hian an thawhpui pakhat, Raijor Dal hnenah bial 11 dinna tur an kian.
Ningani khan regional party leh Congress hian bial dinna insem tur hian inremna an siam a. Gaurav Gogoi-a leh Raijor Dal hruaitu, Akhil Gogoi ten thuthar lakhawmtute an kawm dunnaah an inremna chungchang hi an puang a ni.
Assam-ah hian inthlan chuh tumte tan Thawhtanni thleng hian hming la pek thehluh theih a ni a, a ni tawp berah hian mi eng emaw zatin an thehluh beisei a ni.
April 9-ah mipuiin vote an thlak ang a, vote tlate chu May 4-ah chhiar a ni ang.