Khawpui sawrkar

Aizawl Municipal Corporation, ‘Aizawl khawpui enkawltu sawrkar’ inthlanpui atan political party lian pathum chuan candidate an puang fel ta a. AMC inthlan hi a hun pangngaia neih ringin MNF leh INC chuan February thla khan an lo puang tawh a, niminah ZPM chuan candidate an puang ve leh a. April ni 21-ah vote thlak a ni ang a, April 26-ah vote chhiar a ni ang a, inthlan process tihfel hun hian April ni 30 thleng a awh ang a, May ni 1, 2026 atangin khawpui sawrkar tharin ro an rel leh dawn ta a ni.
AMC election hun sawn hlat chungchangah, State Election Commissioner chuan, assembly session nen a inrual thin leh bichilh lutuk thin chu hma lam hun lo kal zel tur atana siam rem thaa a hriat vang a nih thu a lo sawi tawh a, a fel chho zel turah ngai ila.
AMC a din atangin Aizawl khawpuiah pawh AMC kutthlakna atanga hmel thar hmuh tur a awm chho ve zel a, hmasawnna tur erawh tam tak a la awm tih a lang. Mipuiin chhiah an pek tlingkhawm atanga 80% vel hi khawpui hmasawnna hna thawhna tura serh hran tur a nih lai hian, tuna khawpui hmasawnna leh 80% serh hran chu a inbuktawk em(?) tih te hi mipui lam hian kan chik ve thin hi thil pawimawh tak a ni awm e.
Tun dinhmunah, khawpui chhung MLA constituency 11 hi ZPM party-in an la vek a, chutih laiin AMC-ah MNF an sawrkar ve thung a. AMC hnuaia Ward 19-ah te hian, AMC ruling party (MNF) enkawl Ward-ah leh Opposition party (ZPM&INC) enkawl Ward-ah te hian inthliarna/inthleibikna a awm a nih chuan, khawpui hmasawnna atan ni lovin party hamthatna atan AMC hi kan khel tihna a ni dawn a. Chutiang bawkin, bialtu MLA-te pawhin an bial chhungah duhsak bik leh duhsak loh bik an nei a nih chuan, bial hmangaihtu an ni thei dawn lo tihna a ni bawk ang a. Chuvangin, ‘ruling’ leh ‘ruling lo’ tih hi election campaign auhla atan hman a rem teh teuh lo a tih theih awm e.
Khawpui enkawltu tur atan hi chuan, political party lam dah tha a, candidate zingah tunge kan veng (Ward) enkawltu atan mihring mihrinnaa mi rintlak leh thawk thei tur ni ang, tih hi Ward tin mipuite hian tehkhawngah an hmang deuh thin niin a ngaih theih a. Tunhmaa party politics tuinu an tih mai, ngaihtuah chiang lem lova ‘a haw haw’ zawnga kal mup mup ang kha, tun Generation thar dinhmun atanga teh chuan, a ‘stone age’ rilru tawh tlat, thangtharte hian an ti tawh niin a lang.