Sinner a kal fal lehzual

Thawhtanni mai khan ATP Masters 1,000-a chak zawn rei Novak Djokovic record chu Jannik Sinner chuan a lo khum tawh a. Djokovic reocrd a khum hnuin hnehna a chang zui leh a, record thar a siamna atan a kal fal leh zual.
Indian Wells ah set hloh lova champion Jannik Sinner hian last 16-a a khingpui American Alex Michelsen chu set hloh lovin a hneh a, quarter-final a lut. Sinners hian Michelsen lakah khel chhe lem lo mah se khel tha tak erawh a ni bik lo. Set khatnaah harsa takin break a nei thei hram a, game nga zet hloh chungin set a la. Set hnihnaah an inhnehtawk zui leh viau a, tie-break-ah chungnung hramin Sinner chak zui leh a, Michelsen lakah hian 7-5 7-6 (7-4) a hnehna changin quarter-final a lut Quarter-final-ah American 19th seed Frances Tiafoe a hmachhawn zui leh ang.
World No, 2 Jannik Sinner hi ATP Masters 1000 inelna hnuhnung pahnih; Paris Open leh Indian Wells-ah te set hloh lovin a champion a, Miami Open -ah champion turin rin a kai leh viau tawh bawk. Quarter-final-a a khingpui Tiafoe a hneh a nih chuan semi-final-ah a hneh ve theih tak Alexander Zverev hmachhawn thei dinhmunah a ding.
Sinner hi Miami Open-ah hian kum 2024 khan a lo champion tawh a, 2026 a la dam zingah he hmunah chamion tawh awmchhun a ni mek. Miami Open 2026-ah hian a champion leh a ni chuan World Ranking-ah a chunga awm mek Carlos Alacaraz a hnaih lehzual dawn. No 1 Carlos Alcaraz hian ranking point 13590 a nei mek a. Sinner hian 11600 a nei ve mek thung. Miami Open-ah a champion a nih chuan point 1000 a hmuh belh dawn a, Alcaraz nen an inkarah point 990 chiah a tla zep tawh dawn tihna a ni. Sinner hian 2026 ah bul tan tha lo mah se a insiamtha chak ta viau thung.