Inhruizuan a vawi khat zuana hrui vai kual hnem record siam

Hei zet chu thil awlsam a ni lo tawp ang. Inhruizuana vawi khat zuana hrui vawi hnih vai kual hman pawh a harsat tawh nak laiin, Japanese athlete Kirato Hitaka chuan vawi khat zuana hrui vawi riat (8) a vawi kual hman a, hetiang ti thei awmchhun a la ni a, Guinness World Record a siam.
Thiamthil a ngai a, in-fit a ngai a, a zira zir a ngai a, thawk-leh-khata thiam thut theih chi pawh a ni lo, rei ngial zir a ngai. Kirato chuan record siam tur hian a tirah vawi khat zuana vawi khat vai kualin, a zuang sang telh telh a, chutah a theipalingkawhin, sang takah zuangin a inhruaizuanna hrui chu a vai kual mawlh mawlh a, lei a tlak leh hmain vawi riat a vai kual hman ta a ni.
Kirato hian pawl 5 a zir lai atangin inhruizuan hi a tuipui tan a, a tira chuan a thiam nghal bik em em chuang lo a, a thiam lo pawl tak a ni zawk mah ang. Mahse, a harsatna tak chuan a chophur a, theihtawp chhuahin a bei ta a ni.
Tunah chuan football club-ah telin, hun awl a ngah loh viau nain, nitin inhruizuan hi a zir ziah tho a, record siam tuma a inpuahchahna leh a teirei peihna rah a seng ta a ni.