Punjab leh Himachal Pradesh Press Tour Team te’n Larsap an kawm
Punjab leh Himachal Pradesh Press Tour Team te’n Larsap an kawm
Sawrkar laipui Ministry of Information & Broadcasting buatsaiha Sawrkar project hrang hrangte zirchiang tura Mizoram tlawha rawn zin, PIB Press Tour Team, Punjab leh Himachal Pradesh atanga lokal member 8 te chuan vawiin khan Larsap General (Dr) Vijay Kumar Singh, PVSM, AVSM, YSM (Retd) chu Lok Bhavan-ah hmuin an kawm.
Larsap General (Dr) Vijay Kumar Singh chuan Mizoram chu state te leh mihring tlemna ni mah se, ram pahnih Myanmar leh Bangladesh kar cheha awm a nih avangin India rama hmun pawimawh tak leh, Act East Policy-a hmun langsar tak chang pha a nih thu a sawi a. Ramri lehlama chengte nena inlaichinna tha tak nei anih avangin boruak a ralmuan thu leh buaina lian tham chhuak a awm meuh loh thu a sawi a. Tunhmain Mizoram chu ram buai ni mah se, Mizoram Peace Accord, 1986 ziah hnuah state ralmuang tak a nih tak thu sawiin, tunhnaiah India rama ziak leh chhiar thiam vekna state hmasa ber leh sawhthing khawpui ‘Ginger Capital of India’ a puan anih thu a sawi a; hmasawnna dangte pawh chak taka kalpui chhoh zel anih thu a sawi bawk.
Larsap chuan September 13, 2025-a Prime Minister-in a hawn tak km 51.38 a thui Bairabi-Sairang New Railway Line chu danglamna lian thlentu a ni tih sawiin, Zorinpui thleng turin chhim lamah km 200 chuang a thui siam chhunzawm tum anih thu leh, Kaladan Multi-Modal Transit Transport Project (KMMTTP) va pawha, Paletwa leh Sittwe Port, Myanmar nena thlunzawm tum a ni, a ti a. A zawh fel hunah chuan Mizoram mai bakah hmarchhak state leh India ram pum tana hmasawnna lian thlentu anih dawn thu a sawi a. Mizoram chu ramri depa awm anih avangin ramri kaltlanga ruihhlo tawlh pawh man tur a awm fo thu leh sawrkarin dan lova ramri kaltlanga ruihhlo tawlh leh sumdawnnate theihtawp chhuaha a do zel dawn thu a sawi a. Mizoram chu tribal tamna leh christian sakhua vuantu tamna anih thu sawiin, Kohhran, YMA leh NGO dangte’n khawtlang leh state inrelbawlnaah hmun pawimawh tak an chan thu a sawi bawk.
PIB Press Tour Team-te hian an cham chhunga Mizoram an hmuh dante leh hmasawn zel tura pawimawh nia an hriatte Larsap an sawipui a. Mizoram chu mawi an tih thu leh traffic dan tha taka zawm a ni te, bengchheng ngaimawh tur a awm lo te, khua leh tuite’n inthununna tha neia dan an zawm tha chu entawntlak an tih thu an sawi bawk.
Press Tour Team-te hian March ni 22 khan Mizoram lo thlengin Sairang Railway Station, Thenzawl Solar Plant, Akashvani, PIB Office, DDK Aizawl leh khualhip nasa Reiek te an tlawh a, I&PR hotute leh MJA member-te an kawm a, vawiin hian an haw ang.
PIB Press Tour Team hi Dr. Vikram Singh, Media & Communication Officer, PIB Jalandhar chuan rawn hovin, Dr. Rajeev Lourembam, Head of Office, PIB Aizawl chuan a tawiawm a ni.