Candidate 11 neih theih vangin lawm

Candidate 11 neih theih vangin lawm
Zirtawpni khan BJP-in an party office-ah Political Session an nei a, he huna thusawitu an vice president chuan AMC inthlan lo awm turah candidate 11 an nei thei chu lawmawm a tih thu a sawi.
“AMC Election kan hma lawkah a awm leh ta a, hei hi BJP Mizoram tan chuan chona lian tak pakhat niin, Candidate 11 kan nei thei hi a lawmawm hle a, sorkarna siam thei khawpa candidate tha kan nei thei hi a lawmawm hle bawk a ni,” a ti.
BJP chu an khingpuiten dawt hmangin an bei thin niin a sawi a, state dang dangah an beih dan a inang lo nia sawiin, keini Mizoramah chuan Kristian ram kan nih avangin Kristianna nena inhal thei ang ber tura chirhtheh hi an tum ber a ni, a ti.
Dawtin mipui rilru a hneh tawh em avangin tun hnuah pawh, thu dik kan hriat pawhin kan ring hleithei ta lo a, BJP sorkar avanga India ram hmasawnna te, tuna indona avanga ram tam tak an buaina kara India ram mipuite tana an hmalakna te hi a ropui viau laiin mipui nawlpuite hian kan hre thei ta tlat lo thin a ni tiin a sawi a, chuvangin, Aizawl khawpui mi changkang leh mahnia thu dik hmet chhuak theite hian development hi kan hnawl reng dawn em ni, a ti.
“Register na man chawi ngai lova health insurance neih theihna Ayushman Bharat PM-JAY hi Mizo mipuite kan hriat tlan a pawimawh hle laiin hre lo hi a tam zawk kan la ni a. State sorkar hian mipuiteah zirtirna a pe tam tawk loh vang nge? State Health Care Scheme (MUHCS)-a sum senga inziak lut an tlem phah a hlau tih hi zawhna awm thei a ni hial a ni. Kum 70 chin chunglam ration card eng neite tana PM Health Insurance Scheme (Aayushman Bharat PM-JAY) nuai 5 thleng bill theihna a awm a ni tih hi kan hriat tlan a pawimawh hle bawk a ni,” a ti bawk.