Miami final: Sabalenka vs Gauff

Miami final: Sabalenka vs Gauff
Vawiin Miami Open women’s singles final-a intum tur a hriat tawh a, world number one leh champion lai ni bawk Aryna Sabalenka leh American Coco Gauff an inhmachhawn ang.
Nimin semi-final match hnuhnung zawkah seed ranking pakhatna luahtu Sabalenka chuan 6-4 6-3-a seeded pathumna Elena Rybakina hnehin amah lo nghaktu world number four Gauff nen title an inchuh dawn ta a ni.
Miami Open final thleng hmasa zawk Coco Gauff chuan Karolina Muchova lakah straight sets hnehna changin, Florida nula hian darkar khat leh a chanve lek chhungin 13th seed lakah 6-1 6-1 hnehna nuamsa a sualchhuak hman a, a tum rukna atan WTA 1000 final a lut.
Czech Republic nula Muchova kha kumin Australian Open fourth round lamah pawh kum 22 mi Gauff lakah straight sets bawkin a lo tlawm tawh a, America leilungah pawh tualchhung nula a ngam zo leh ta lo a ni.
Zirtawpni semi-final hnehna avang khan two-time Grand Slam champion Gauff chuan karleh Thawhtannia WTA ranking thar tarchhuah turah world number one hlui Swiatek hmakhalhin pathumna a luah chho ang.
Tunlaia world top tennis star pahnih Aryna Sabalenka leh Coco Gauff inhmachhawn turah Belarusian-in a title kawl lai a humhim thei a nih chuan US tournament lian pakhat dang Indian Wells-a a champion tawh avangin he inelna pahniha a indawta champion theite sawina ‘Sunshine Double’ title a chang thei dawn a ni.
Defending champion Sabalenka hian Miami Open final-a American mihang player Gauff a hneh chuan hmeichhiate zinga ‘Sunshine Double’ hlawhchhuak thei pangana a ni ang.
World number two Rybakina kha kumin January thla Australian Open final-a a hneh hnu Sabalenka lakah tuntum chu a hmai a uang zo ta lo a ni.
Vawiin final-a American world number four Gauff leh Sabalenka inhmachhawn tur hi an career-a tum 13 an insutna tur chiah niin, nikum French Open final-ah Gauff a chak a, WTA Finals hnuhnungberah world number one Sabalenka a chak ve thung.