Hmasawnnan – Buaipui bik neih….

Tun hnai khan Mizoram agriculture minister chuan Kerala state-ah Directorate of Cashew nut & Cocoa hotute a kawm tih chanchinthar lamah hmuh tur a awm a. Cashew nut leh Cocoa chauh buaipui tur directorate hran liau liau te a lo awm reng mai a. Hetiang hian, Mizoram pawh hian, thlai leh thei champion-pui theih tur hi zir chiang ila, buaipui ngar ngar mai ila, chu chu hmasawnna tluantling kan neih theih dan tur a nih a rinawm. Entir nan, thei lamah chuan Sapthei (Mizoram Sapthei), thlai lamah chuan Mizo hmarcha (Mizo Birds Eye Chilli) ang te. Sawhthing hi chu a kuma khuaa buaipui chi a nih loh hmel, tunah pawh hian sawhthing thlakna tur hi sawrkar hian ruahman tan tawh se a tha ang. Tun ang renga kan kal chuan, kum 50 a han ral leh meuh chuan, Mizoram leilung hi thlai dang chin theih lohna hmunah kan chhuah mai ang tih hlauhawm tak a ni.
Mizoramah hmasawnna hmel thar a lang ve zel a, sawrkar laipui chakna ringin kawngpui zau nuam tak tak te, rel kawng te a thlur ve ta seng sung mai, a lawmawm e. Chutih rual chuan, Mizoram hian keimahni kutkawiha kan state (ram leh mipui) hmasawnna tluantling ve deuh sual chhuah eng nge kan neih ve tawh reng reng tiin han inzawt ila, sawi tur a tam lo hle. Eng pawh deuhthaw mai hi han bel chiang ila, ‘hma kan la mek’ tih hi a tlangkawmna a ni deuh zel mai.
Tun thlenga ei leh bara kan la intodelh thei lo hi eng nge a chhan ni ang? Hmasawnna tur kawng eng eng emaw (flagship programme) kan ruahman ve thin a, ruahmanna hi chu a chhe ngai lo; ruahman ang hian kal tum tak tak ila, tih theih loh a awm lovang; mahse, tihhlawhtlin a ni ngai tlat lo hi kan mutan lian ber chu a ni. Hei hi a chhan bulpui ber nia lang chu, heng policy/scheme/programme te hi inthlan (election)-a chakna atan chauh kan tawktarh thin vang a nih a rinawm ta ber a ni.
Sawrkar kal tawh zawng zawngin flagship programme an siam reng reng kha a nih dan tur angin thahnemngai takin kalpui thin se, Mizoram hi a changkang tawh hle ang; model state nih theihna tham a ni tawh; mahse kan la ni tlat lo. Inthlan tinzawn (election oriented) chauha ruahman a nih thin vangah puh a nuam ber ang. Tuna sawrkar pawh, eng nge a hnutchhiah ve dawn tih hi hi enthlak mek a ni.
Mizoramah mihring tlemte kan awm a, ram zim te a ni a, state danga DC pakhatina a enkawl mihring pawh zat lo kan ni a, hmun zimtê MLA 40 rualin an enkawl a. Kum khat budget aia tam leiba nei chungin hmasawnna hna kan thawk kan ti a, hma lah kan sawn phah em em bawk si lo.
Hma kan sawn theih lohna chhan hi, tih takzeta thahnem kan ngaih tawk loh vang a ni ber a, chumi awmzia chu kan ram leh hnam hi kan hmangaih tak tak lo, tihna a ni ber mai awm e.