MSL 11 Semi Finals – Mipui tan rawn Zemabawk BC Zuam sual awl Zarkawt BCA
Mizoram Super League (MSL) 11 ah hian dawt sawi a thiang lo a nih ngai chuan Zemabawk BC hian tantu leh thlawptu an nei tha ber tih hi thu dik a ni! Zuam sual awl team an awm ngai a nih thung chuan Zarkawt BCA hi an ni chiang – MSL history keu let ila, a fiah!
Zanin hian R. Dengthuama Indoor Stadium, Salem Vengah MSL 11 semi finals game 2 khel turin Zemabawk BC leh Zarkawt BCA te dar 8:30 pm ah an inlan leh dawn a; game 1 ah Zemabawk BC an lo chak tawh avangin pressure Zarkawt BCA lakah a awm lo thei dawn lo – zanin hi club pahnih tan inkhel pawimawh fal nalh a ni dawn.
Mipui tan rawn Zemabawk BC
The Aizawl Post Hoops Mania chuan mipui mar dekin zanina inkhel turte chungchang hi zirchianna a nei a; kum 2016 a din ZBBC hian mipui tan an hlawh ngang mai.
ZBBC hi club hlun leh hlu pahnih Khatla TBL leh Zarkawt BCA ten champion nomawi an inchawi chhawk tawn zak zakna MSL ah hian MSL X a an rawn inlan phat atang khan beisei phak bakin result an nei tha a, kumina an tualchhung star player Ropuia leh Thianga an khelh that tulh tulh avang bakah P. Tomar rawn inlar hnua harhtharna an chang hi basketball hmuhnawmna a belh chhah a, tualchhungah ZBBC hian mipui mar dek thiam taka an Instagram vela an inphochhuah thatna te hian thlawptu an neih nasat zual phah.
Mipui tan an hlawhna laimu zawk tak ni a lang chu big club pahnih rorelna chhu chat tura an club puipa lamin theihtawpa match 3 an chak loh zawn hnua an club an rawn thuam tha thar hian Zatkawt BCA leh Khatla TBL champion ning tawhtuten ZBBC hi an tan rawn phah tha thup a ni.
Sawi lan hmaih thiang lo chu ZBBC in Zofate infiamna huanga an hniak rawn hnutchhiah mawm tak hian Zemabawk a tiphurin a tipumkhat lai tak hi a ni. ‘Zemabawk’ tia khuangpui ri rum rum nena stadium chhunga an au thangkhawk hian veng inlungrualna dar a ti ri pha tlat!
A khaw nawtin Aizawl an nghawr leh dawn – zanin hian! Mizoram basketball inkhawmpui lian berah palai thlen kim zan kan thleng dawn ta, Zemabawk tantuten minute 15 aia rei lawm thei tak maw?
Fei leh tlo Zarkawt BCA hi!
Mipui mit virna chhang let thei Zarkawt BCA hian hlawm khata intelkhawm club supporter an nei vung hluah ngai len lo; mahse, heti chung hian he club tantute erawh hi chu an ruh em em tlat!
Thil hlu eltiang pawh hi ngaia neih palh hi a awl nek; Zarkawt BCA in MSL 11 khelh an tum tawh lo thawm an han ri zet kha chu Mizoram basketball huang mai ni lovin, infiamna khawvel a phu zawk a nih kha! He club hi tawp lo se, la kal zel se tih thawm kha a puahin a puak awn awn a, an elpui te pawhin tawp lo se tia an duhna kha hmuh tur a tam hle.
Zemabawk BC lam hi an fimkhur loh a, Zarkawt BCA hi awlsam taka paltlang tura an inngai a nih vaih chuan a kum zawnin semi finals-ah hian rilru na takin an indawm palh thei – Zarkawt BCA tlo leh fei zia chu mihring dam lai mitmu tam takin a lo hmu tawh!
Zarkawt BCA innghahna veng Zarkawt lam hian an veng club hi an thlawp hun a inherchhuak ngai a nih chuan zanin tluka thlawpna rawl nena an chhuah a tul hun hi a tam lo maithei. He club hian an veng hi vawi duai lo a lo vawrh sang vawn vawn tawh a, hmingthatna pawh an veng tan hian a lo hawn hnem tawh – a hmun ngeia tan leh thlawp tura Zarkawt BCA tana thawhchhuah hun a ni.
Zemabawk BC leh Zarkawt BCA bukin an awm ang a, Mizoram basketball pawh hi a inhersawn danglam zui dawrh tel bawk dawnin a hriat!