Black-a petrol hralh hi….

March 28 khan Mizoramah chief secretary hoin Food, Civil Supplies & Consumer Affairs department hotute, deputy commissioner zawng zawng leh oil marketing company an thukhawm a. DC-te hian an district chhung theuhah LPG, petrol leh diesel stock tam tawk tak a awm tih an sawi a.
Hetih lai hian March 29 khan Lunglei AOC Venga Mizofed Filling Station atanga dan pela lei, petrol litre 1600 leh diesel litre 400 chu Lunglei Police-in filling station an chhuahsan hmain an man a. Thu dawn danin, heng oil hi Myanmar lama phurh tum a ni a; Lunglei disrict magistrate chuan hetianga phurh chhuah hi khapna thupek a lo tichhuak tawh a ni.
Kan hriat angin, tun lai hian ram leh ram indona a punlun chho zel a, tun dinhmunah India chuan tuialhthei stock a la tam tawk tiin mipui hnem mah se, indona hian englai pawhin tuialhtheia harsatna hi thlentir thut thei a nih reng avangin, Mizoramah hian tuialhthei dahkhawlna (Oil Depot) changtlung zawk hi a rang lama a ngaihtuah ve a pawimawh dawn hle. State dang atanga a tlachawpa lakluh ringawta innghah hi a him lo hle a ni.
Hetih lai hian, tualchhungah petrol/diesel black-a zuartute an awm a, hei hi dan kalh a ni a, district magistrate-te pawhin a inpha man tawkin khapna thupek hi an tichhuak reng a, mahse black-a petrol/diesel zawrh hi a reh/tawp tak tak thei lo. A bikin Aizawlah phei chuan, khawpui laili lai tak leh langsar takah, filling station bulhnai, chil chhak phak lek tak takah hian ni tin petrol blacker-ten petrol an hralh chur chur reng a, dan kengkawhtute hian dan hi an kengkawh tak tak ngai lo tih a lang a, chuvang chuan blacker-te pawh hi an huangtau ngam niin a lang.
Black-a petrol zawrh hi dan kalh ni mah se, a lehlamah chuan, filling station-a petrol lak tur a awm loh changa mipui harsatna phuhrutu an nihna lai a lo awm ve leh a, dan kalha thiltih hian mipui harsatna a sukiang ve leh lawp lawp thin bawk. Black-a petrol zawrh hi dik lo hle mah se, a thatna lai a awm ve leh tlat thin. Ual-au lutuka petrol khurpui bul maia an thu lang reng erawh mit a kham e tih lohah chuan, black-a petrol zawrh sawimawina ni lovin, state pawn lam (Myanmar) vela tam tham tak tak phurh chhuah daih ai chuan, hetia black-a lei tur a lo awm ve thin hi, a ram leilung fate hian kan chhawr tangkai phian zel zawng a nih hi.