Israel-in indo zawhah Lebanon chhim thunun zui tum

Israel-in indo zawhah Lebanon chhim thunun zui tum
Israeli defence minister chuan ralthuam keng, Hezbollah nena an indona a tawp hnuah pawh Lebanon chhim lam chhungah buffer zone siamin ram zau takah venhimna thunun tura an awm chhunzawm tur thu a sawi.
Israel Katz-a chuan an luah tur hmun hi Lebanon chhim lama Litani lui, Israel ramri atanga km 30 vela hlaah a chho dawn tih a sawi.
Israel ramri bula Lebanon khaw hrang hranga in awm zawng zawng chu thiah vek a nih tur thu a sawi bawk.
Lebanonese Social Affairs Minister Haneen Sayed-a chuan Israel-in ruahmanna a siamte hi a taka kalpui a nih chuan a ram thuneihna ‘bawhchhiatna lian tak’ a nih tur thu a sawi a. Katz-a thu puan hi Europe ram hrang hrang, Canada leh UN te pawhin an sawisel.
Israel hian March 2 khan Lebanon chhim lamah sipai a tir a, ram chhung hmun dang pawh nasa takin a bei bawk.
He a hmalakna hi February thla tawp lama US-Israel leh Iran indo tan tirha Iranian Supreme Leader thah phuba lak nana rocket-a Israel hmar lam a kah hnua a kalpui a ni.
Kum 2024-ah inkahhai puan ni mah se Israel pawh hian hemi hma pawh hian ni tin deuhthaw Hezbollah hi a bei thin.
Lebanon health ministry-in a tar lan danin March thla tir atang khan Lebanon-ah mi 1,238 an thi tawh a, an zingah hian naupang 124 chuang an tel a. UN humanitarian affairs office chuan damdawia thawk mi 52 an thi tawh bawk niin a sawi.
Hemi hun chhung vek hian Hezbollah beihnaah Israeli sipai 10 leh civil mi pahnih an thi niin Israeli thuneituten an sawi.
Israeli sipai leh Hezbollah inbeihna avang hian mi maktaduai khat chuang, Lebanon-a cheng mi paruka pakhat vel chu hmun him danga insawn an ni tawh.
Israeli thuneitute chuan an tum ber chu Hezbollah beihna laka an ram hmar lama chengte venhim a nih thu an sawi.
Thawhlehnia defence ministry-in video statement a tihchhuaha thu a sawiah Katz-a hian Israel-in Lebanon chhim lama sipai hmanga chet an tum dan a sawi.
“Beihpui thlak tawpah IDF hian Lebanon chhungah security zone a insiam ang a, anti-tank missile laka invenna a din ang a, Litani thlengin hmun pum puiah himna a vawng ang,” a ti.
“Hei bakah hian Lebanon chhim lama cheng, hmar lam pana insawn mi 6,00,000 chuangte chu Litani chhim lam a him tih a chian hma chu hmar lamah chentir an ni ang,” a ti.
“Lebanon ramri bula khaw hrang hranga in zawng zawng chu tihchhiat vek a ni ang a. Gaza-a Rafah leh Beit Hanoun angin ramri bul hmar lama mite tana hlauhawmna chu vawi khat nan tihbo a ni ang,” a ti.
Katz-a hian thla tir khan Lebanon chhim lamah buffer zone siam a tum thu a lo puang tawh a. Israel hmar lam a him hma chuan raltlante chu kir leh phalsak an nih loh tur thu leh in pawh thiah a nih tur thu a lo sawi tawh bawk.
Tuna a thil sawi hi a hmaa a sawi ai chuan a kal thui a, Israeli sipaite chu Hezbollah nena an indona a tawp hnuah he bial chhungah hian an awm chhunzawm zel dawn tih a sawi ta a ni.
Katz-a video a chhuah hnua Reuters news agency-in an kawmnaah Lebanonese Social Affairs Minister Sayed-a chuan, “A thlen loh kan beisei a; mahse, sorkar angin kan inbuatsaih a, kan ngaihtuah a ngai a ni,” a ti.