Italy tuarah vanpui a chim

March 31, Thawhleh zan khan Europe khawmual atanga World Cup khel tur zawnna hnuhnung playoff final khelh a ni a. Football ram ropui, World Cup-ah pawh vawi li ngawt lo champion tawh Italy chu Bosnia and Herzegovina hneh lovin an tlawm a, a zawna a vawi thum nan World Cup an khel phak lo. Bosnia lakah tlawm a, World Cup khelh phak loh hi football thiam ram Italy tan an tuara vanpui a ni tak meuh! Italy rual hian Denmark pawhin World Cup an khel phak lo ve bawk.
Tling teuh apiang pawi tih a zual
A zawna World Cup vawi hnih khel phak lo zawn tawh Italy hian a zawna vawi thum em em World Cup khelh phak loh an hreh hle a, final a an khingpui Bosnia and Herzegovina hneh ngei tumin tan an khawh nasa hle. Mikhual an nihna hmun ; Bilino Polje Stadium-ah bul an tan tha viau a. goal pawh an thun thuai. Hma takah goal thun bawk mah se an player pawimawh Alessandro Bastoni chu chawlhlawk hmaa hnawhchhuah a nih vangin an dinhmun a phet zo. Tlem zawk ni chungin hun pangngaiah tlawm bik lo mah se penalty shootout ah an vanduai zui ta thung.
World Cup khelh phak ngei tuma tan khawh Italy tan hian Moise Kean chuan minute 15-na lekah hmahruaina goal a thun. Hma takah goal an thun vangin an phur viau a, chak theihna hun pawh an nei tha viau. World Cup an khel phak ve tawh ngei turah inngai hman bawk mah se World Cup khel phal lo turin an vanduai a kaltluang a, chawlhlawk dawn hnaih minute 41-naah Alessandro Bastoni hnawhchhuah a ni. An mualah tawm zawk an nih vangin Bosnia an phur thar ve thung a, goal thum tumin an mikhualte an nawr zui nasa hle. Goal thun tum viau mah se chawlhlawk hmain goal an thun thei bik lova, hnufual zawk ni chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, tam zawk ni chunga inlan Bosnia in an khingpuite an nawr nasa hle a, hun tawp dawn hnaih lamah an vannei ta nge nge. Bosnia tan hian Haris Tabakovic chuan hun tawp dawn hnaih minute 79-naah goal thunin an si phurh a sut. An si phurh an sut vangin an phur leh zual a, an mualah chak ngei tumin tan an khawh zui nasa hle. Goal thun tumin an mikhualte nawr nasa viau mah se goal an thun belh thei bik lo. Minute 90 an khelh hnua miunute 30 dang an khelh belh leh hnuah pawh goal thun belh thei an awm tawh lova. tie-break hmangin World Cup khel tur zawk zawn chhunzawm a ngai.
Penalty shootout ah hian Bosnia tana pettu mi paliin an pet goal vek laiin Italy tana pettu pahnih; Pio Esposito leh Bryan Cristante ten an thelh thung a. Boruak sang leh zamawm takah Bosnia in awlsam takin hnehna an chang a, 4-1 a chakin footballram ropui Italy an pet tla a, Khawvela ennawm ropui ber FIFA World Cup khel turin an tling.
Italy tan a na lua e
Italy hi football ram ropui, World Cup-ah pawh vawi li lai champion tawh an ni a. Germany nen champion tam ber dawttu an ni a, an chungah vawi nga champion tawh Brazil an awm mek. Player lar leh hmeltha tak tak an nei thin a, Roberto Baggio hun lai te, Paolo Maldini hun lai te leh Francesco Totti hun lai te pawhin Mizoram atangin pawhin tantu an ngah em em thin a, ‘MHIP Team’ tih an ni hial thin. Football ram ropui ni bawk mah se World Cup khel turin an tum a fuh thei ta meuh lova, a zawnin vawi thum ngawt World Cup an khel phak dawn lo der tawh.
Italy hi Russia World Cup 2018 khan an inlan phak lo tawh a, Qatar World Cup 2022-ah an inlan phak lo leh bawk. USA, Cannada leh Mexico in a thlen tur World Cup ah inlan tum viau mah se playoff final paltlang zo lovin an tla zui leh ta mai a, Italy tan a zawna vawi thum ngawt World Cup khelh phak loh hi a na lua a, a na vawng vawng a ni satliah lo, an tan vanpui a chim tak zet zet a ni.
World Cup khel phak lo mah se Italy hi Euro 2020 ah an champion leh nawlh ang reng lawi. Euro-ah ropui takin champion bawk mah seWorld Cup an khel phak leh ta chuang lo zui a. 2026 ah an tling zo lo leh ta bawk nen Italy hian World Cup khel turin mutan lian tak an nei a, an mutan hi engtia chin fel tur nge tih an zawnchhuah a ngai a, chhawk ngai chhawk a, belh ngai belh a ngai dawn a ni.
Denmark pawh an tling lo
Italy ang thoin inkhel hmuhnawm lantir thin Denmark chu World Cup khel turin an tling zo bik lova, hun pangngaiah Czechia nen 2-2 a an inhnehtawk hnuin penalty shootout ah an vanduai a, World Cup an khel phak ve dawn ta lo a ni.
Czechia hian Generali Arena-a an mikhual Denmark lakah bul an tan tha viau a, inkhel tan atanga minute 3-na lekah Pavel Sulc chuan hmahruaina goal a thun nghal. Hma takah goal an thun vangin an phur viau a, an mualah inrintawkna sang zawk nena inlanin hun rei tak chhung hma an hruai nghe nghe. Hnufual zawk an nih reng hnuin Denmark tan Joachim Andersen chuan minute 72-naah goal thunin an si phurh a sut. 1-1 a nih hnuin inkhel a hmuhnawm zui viau a, hun pangngai minute 90 chhungin goal thun belh thei an awm lo.
Hun pangngaiah chak zawk an awm theih loh vangin minute 30 dang an khelh belh leh a, a hmuhnawm zui hle nghe nghe. Mualneitu Czechia tan Ladislav Krejcí chuan minute 100-naah hma an hruai nawn lehna goal a thun. Hma an hruai nawn leh vangin phur viau mah se an phur rei lo hle. Czechia mipui ten hma an hruai nawn lehna goal thun lawma an au thangkhawk em pawh a reh fel hmain Kasper Hogh chuan minute 111-naah goal thunin an si phurh a sut leh ta mai a. Inelna boruak a sang thar leh vut vut. Inkhel hmuhnawm takah goal lut a awm belh thei tawh lova, penalty shoot out hmangin chak zawk zawn chhunzawm a ni.
Penalty shootout ah hian Denmark lamin an thelh fua fua a, Czechia tan Ladislav Krejcí chuan thelh bawk mah se an mikhual Denmark lakah 3-1 ngawtin an chak a, World Cup khel turin an tling zui ta a ni. World Cup-ah tha zawkin inlan ngei an tum dawn a, inbuatsaihna tha zawk nen an lo kir ang.