Messi-a’n goal a thun

World Cup khel tura inbuatsaihna hnuhnung lamah World Champion Argentina chuan thawhlehni khan awlsawm takin hnehna an chang a, an khingpui Zambia chu 5-0 ngawtin an sawp. He inkhelah hian Argentina tana goal thun hnem ber Lionel Messi chuan goal khat a thun.
Argentina hian lberto José Armando-a an mikhual Nambia an ngam hle a, goal pawh an thun hma hle. Inkhel tan atanga minute lina lekah ram tana khel tha thei tak Julián Álvarez chuan hmahruaina goal a thun nghal. Hma takah goal an thun vangin an inringtawk leh zual a, goal tam zawk thun belh tumin an khingpuite an nawr nasa hle. An mikhualte ngam viau mah se goal dang an thun belh thei lawk lo thung. Goal lut a awm belh loh reng hnuin player ropui Lionel Messi chuan minute 43-naah an goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah Argentina an khel tha leh zual a, goal thum an thun belh. Second half tan atanga minute nga hnu lekah Nicolás Otamendi chuan penalty atangin an goal thumna a thun teh tlat a, hmahruaina a tizau. Goal thun thei Lionel Messi-a’n goal thun tam hrim hrim duh se penalty a pet ngei tur a nih laiin defender Otamedi-a’n a pet teh tlat hi a ropui dangdai ve riau a ni, Otamendi goal thun hnu hian Dominic Chanda chuan an lamah a ti goal palh a, World champion hmahruaina a tizau leh zual. Own goal a awm hnuin Valentín Barco chuan minute 90+ah an goal ngana a thun zui leh ta a ni.