Mizoram tana medal late lawmpui

On Apr 4, 2026 2 0

Mizoram tana medal late lawmpui
Khelo India Tribal Games 2026 a Mizoram tana weightlifting a medal la mi 8 chu Ningani khan Sports & Youth Services minister Lalnghinglova Hmar chuan a lawmpui.
Minister chuan, state an tihmingtha hle a, an lawmna tizualtu chu tun Khelo India-a Mizoram medal hmuhna discipline pathum chu Empowering Mizoram Sports an kalpui meka sport discipline ngaihpawimawh tur an thlan zing ami vek a ni, tiin, weightlifting-ah kan che tha ber a, wrestling leh hockey-in an dawt tih a sawi.
Khelo India Tribal Games-a medal lak chu a kalkawng a ni a, an tum tur chu National Games a ni tih sawiin, “A aia sang chu a hunah kan thlir zel anga, tunah chuan a chung leh ami zel kan ngaihtuahnaah kan dah ang,” a ti. Tun hlawhtlinna hian weightlifting-ah Mizoten a takin theihna kan nei tih a nemnghet nia a hriat thu a sawi a. Incentive Cash Award sem leh hunah an dawng thei dawn tih a sawi bawk.
Khelo India Tribal Games 2026 hi March 25 atanga April 3 chhung Chhattisgarh-a Raipur, Jagdalpur leh Surguja ah neih a ni a. India ram state hrang hrang infiamna chi hrang pasarihah inelin, Mizoram hian football, hockey, weightlifting, wrestling leh athletics-ah infiammi 69 a tir a ni.
Empowering Mizoram Sports kaltlangin weightlifting-ah talent tha haichhuah a ni thei dawn tih Lalnghinglova Hmar hian a sawi a. Khawtin VCP, GSA, YMA pawhin tan la se, weightlifting hi EMS kaltlang hian lo thlang zel se an duh tih a sawi. “Khawtinah naupang chak kan hre duh a, naupang thui tak kal zel thei tur kan hre duh. Weightlifting hi national leh a chunglama medal lak theihna a ni,” a ti.
KITG 2026-ah hian Mizoram-in inelna dangah silver medal pahnih leh bronze medal pahnih la tawh bawkin, he chanchin buatsaih lai hian a pumpuiah pasarihna a ni mek.
Khelo India Tribal Games 2026-a weightlifting medalists – Isac Malsawmtluanga (60kg men) – gold, Silvan Beihrothathlo (71kg women) – gold, Zosangzuali (86+kg women) – gold, David Zohmingmawia (110+kg men) – gold, David Lalzawmdika (100+kg men) – silver, Lalfakawma (79kg men) – silver, Laithanpuia (65kg men) – silver, Jacob Vanlaltluanga (79kg men) – bronze a ni.