MSL 11 – Sabengtung a liam, khenbeh zan! The King Zarkawt BCA versus The People’s Champion Zemabawk BC

Thawnthu hlui leh thar chu
MSL bul tan tirh kum 2015 khan Zarkawt BCA finalist an ni nghal pang! Kum 2016 kan thlir kir erawh chuan MSL season hnihna a ni a, tlak loh hrâm tumin an MSL season hnihna ah hian relegation match an khel leh lawi si!
Kum 2026 kan chuang kai a, Zemabawk BC pawhin an MSL season hnihna hmang ve tho in a zawnin MSL semi finals an lut thung! Club pahnih te MSL season hmasa pahnih khaikhinin ZBBC record a thlanawm zawk tlat!
Tun MSL season 11-ah hian Zarkawt BCA hneh thei awmchhun chu Khatla TBL leh ZBBC hi an ni zui bawk!
Tarlan tak angin club pahnihte MSL season hmasa pahnih thlirin ZBBC record a tha fe zawk a; amaherawhchu, MSL 1 – 11 pum thlir erawhin Zarkawt BCA khin phak rual an ni lo – MSL 2 leh 3 tih loh chu finals-ah an la inlan vek, belh khawmin season 8 lawih finals hi an chuang kai tawh nia – karei!
ZBBC tana ngaihnawm leh phurawm ber lai chu MSL 11 ah hian mipuite thinlunga lal (the people’s champion) chuh buai phak rual lohin ZBBC hi an ni tawh.
Zanin hian club pahnih thlawptu leh tantu an neih te hi R. Dengthuama Indoor Stadium-ah an fuankhawm dawn – Sabengtung chungah lal angin semi finals an khelh hmasa game pahnihah tumkhat ve ve an chuang tawh a; club pakhat zawk hi khenbeh zan a ni e!
Khenbeh tur khaikhinna
Head coach pahnih K-a leh Sangpuia hi team an enkawlna piah lama thil danga lansarh theihna tura phar buai lo chi an ni. Coaching lama tawnhriat ngah zawk erawh Sangpuia a ni thung.
An asst. coach pahnih Sangkima leh V-a hi ze inang thawkhat, kamchhuak nei tlem ve ve tho an ni bawk – kum lama upa zawk V-a hian coaching lamah hniak nei hraw zawkin Sangkima erawh BCA chenchilhtu a ni a, player anga kum tam tak a khelhna tan tun season hian a tumkhat nan asst. coach turin a inlan.
An club puipa lam thlirin Zarkawt BCA aiin ZBBC hi an inkulh nghet zawk. He club neitu pahnih Faki leh Ricky-a erawh hian inanna thui leh thuk tak neiin, ral khat atanga an club hi vil mai lovin, an hna leh eizawnna piah lama an hunawl neihah team kiangah ban phakin an kun hniam ve ve thin hi club daih rei zia a ni.
MSL 11 ah hian tualchhung tlangval tawnhriat nei ngah zawk Zarkawt BCA hian Mizo zinga palian kan neih that ber Matthew Sailo leh Zonu chhul atanga hrinchhuah tawha point guard tha bera mi tam tak chhal Zonuna kawlin, duhna hmun apianga chhawr ngam leh chhawr tlak utility player tha chungchuang ‘the cool rider R-a’ an kawl bawk mawle…
ZBBC lamah hian Mister MVP tih ngam, fans lamin ‘MVP’ tia tun inelnaa an koh awmchhun Ropuia (the unstoppable) an nei a, a kiangah tharum ngah em em fit 6’3 zet Thianga a la awm cheu.
Anni ‘the special duo’ te dawtah hian hun khirhkhana rawn pen chhuak tur ZBBC hian star player ni phak minute pek tam phu an nei em? Fans lam kutah chhanna a awm e.
Zan zahawm leh zamawm
Zanin hi kristian sakhaw serh leh sang pawimawh hun lai a ni a, rilruah Gethsemani huan a lang thup dawn a, taksa erawh Salem Veng Ar huan thlanga R. Dengthuama Indoor Stadium-ah a awm thung dawn.
MBBA puipa lamin inelna tha ber chhawpchhuah tumin mual hrang hrang atangin stadium an pan ang a, hlawh chu sawi loh hlawkna Indian Rupee lamah hmuh tur an nei leh dawn bik lo!
Club puipa lam pawhin an senso sawma pakhat pawh hmuh let tur nei lo tih in hre mah se, chak loh palh hlau zek zek chungin fans an huikhawm cheu ang. He Mizo hnam kalsiam hi anni hian an zen phak a, an hlep chu nun kawng tha zawk leh rualelna rilru an chipuite tana an hlan hi he hnam hian a theihnghilh tawh dawn lo!
Print media lama MSL 11 viltu te leh Visual media lam a hmuna thutchilhtu Zonet Cable TV Pvt Ltd pawhin thurchhuah tur tha lai an chang leh khiau bawk dawn.
A hmuna entu leh in lama thlirtu zingah tang tak tak ngawi ngal leh thlitfim leh chik taka belhchian aia rilrua lang hmasa apiang rik pui phawng phawng (cancel culture citizen) an tlep leh tuarh dawn bawk.
Heng zawng zawng hi infiamna ken tel a ni. A tawpa chak lo zawk bianga mittui luang chhuak tur te thleng hian sports huanga mi chu a ni leh dawn! A chak zawkin na tuar a tlawm zawk tan hmuh hrehawmin hnehna hlado chham lul lo se…
Khaikhawmna
Semi finals game- 1 ah points ZBBC 81 – 74 Zarkawt BC; game 2-ah Zarkawt BCA 83 – 63 ZBBC.
Semi finals game 1-ah rebounds ZBBC 45 – 50 Zarkawt BCA; game 2-ah Zarkawt BCA 44 – 36 ZBBC.
Semi finals game-1 ah assist ZBBC 12 – 13 Zarkawt BCA; game-2 ah Zarkawt BCA 11 – 13 ZBBC.

Zanin inkhel tur:

Zarkawt BCA Vs Zemabawk BC – 8:30 pm (Game 3)