AMC inthlan turah hna lak tumnaa MCC bawhchhiat theihna lut tam
Aizawl Municipal Corporation inthlanpui neih hun puan a nih hnu ah model code of conduct-in a phal loh sawrkar hna lak tumnaa dan bawhchhiat leh State Election Commission lama hna lak dilna lut a awm nual.Thudawn danin, State Election Commission Mizoram-in AMC 2026 inthlan hun a puan – March 18 hma khan sawrkar hna lak tur advertisement tihchhuah tawh leh tihchhuah tum mek a awm nual a. Department thenkhat chuan hna lak turah personal interview neih hun a lo duan lawk tawh ang chi pawh an thulh (cancel) laiin, department thenkhat model code of conduct (MCC) puan a nih leh nih loh thlu lem loa anmahni kal kala kal an awm tih sawi a ni.
Environment Forest & Climate Change department hnuaiah principal chief conservator of Forests (PCCF) pisa-in 2026 March 21-a LDC (provisional employee) atana mi 15 lakna tur advertisement a lo chhuah chu SEC hian a ngai thutak hle tih thu dawn a ni a. MCC bawhchhiatna a nih avangin PCCF leh advertisement tihchhuahsak tura buaipuitu Information & Public Relations director chu insawifiah turin a ko. Koh angin SEC hmaah an inlan a, hna lak tumnaa hmalakna hi sut zui nghal a ni.
Hei bakah hian MCC bawhchhiat theihna na ang chi a awm nual a, a bikin sawrkar hna lak tumna leh sawrkarin programme a lo buatsaih tawh ang chi a tam. SEC-ah hman phal dil an awm nual a, tun thlengin heti ang chi dilna 16 lut zingah 6 chu phalsak an ni loa, a dang 6 chu a hman dan turah intiamkam tirin phalsak an ni. Pakhat chu ngainathiam an ni a, a dang ho chu thurawn pek hnua hman remtih an ni.
State election commissioner Dr H Lalthlangliana chuan MCC chungchang hi thuthar thehdarhtute hnenah a lo sawi tawh a. “Model code of conduct chu sawrkar hmalakna kal mek tibuai tur emaw titawp tur emaw a ni loa, chutihlaiin ruling party an ni emaw eptu party an ni emaw, hmingthat pui bik leh hlawkpui bik an awm loh a, rualkhai taka a huam theihna atana puan thin a ni,” a ti. Tunah pawh sawrkar hna kal lai chu a ngaiin a kal reng thei a, chutihrualin party mal emaw mimal emaw hmingthatna bik awm theihna tur kha tih rih loh tur a ni mai tih a lo sawi tawh a ni.