Corruption Free AMC siam kan tum – K Sapdanga
Corruption Free AMC siam kan tum
– K Sapdanga
Aizawl Municipal Corporation-a ZPM candidate chu corruption laka fihlim thei tur vek an ni a. A chhan chu ‘Corruption Free AMC’ siam an tum vang a ni tih ZPM hruaitu K Sapdanga chuan a sawi.
Inrinni zinga AMC Ward No.III campaign khuhhawn a hmanpuinaah K Sapdanga chuan, ZPM party candidate-te chu corruption laka fihlim thei tur vek an ni tih sawiin, “A chhan chu, Corruption Free AMC siam kan tum vang a ni. State sawrkar leh Val Upa Council-in uluk takin an vil zui anga, AMC-ah Pathian ram tun din tumin theihtawp kan chhuah ang,” a ti.
UD&PA minister K Sapdanga chuan Finance Commission atanga dawn Urban Local Body Fund, state sawrkar atanga fund leh property tax atanga mipui thawhkhawm chu dik taka hman nise, khawpui tihhmasawnna atan a tangkai thamin an hria tih a sawi a. Bawlhhlawh lak khawm dan tha zawka kalpui an tum dawn tih sawiin, “Mipuiin bawlhhlawh motor lo chan ngai tawh loin, in tina mi khawn (door to door collection) veng thenkhatah enchhin a ni anga, mipui zangkhaina siam bawk, fai zawkna ni bawk. Bawlhhlawh paihna atana sum chevel hian chu chu a daihin kan hria,” a ti.
Bawlhhlawh sawngbawl dan pawh mumal zawkin, chhuahlam Tuirial kamah tawih thei chauh, tlak lam Luangmual ramah tawih thei lo plastic adt., chhim lam Hualngohmunah in sakna bungraw chhia ho, awmze neia sawngbawlin hralh suma chantir vek an tum tih a sawi.
Kawrpui leh tuidawn inkar chu tuiluankawra thlun zawm vek an tum a, Aizawl khawpui leimin laka chhanna atana mithiamte thurawn tihpuitlin an tum tih a sawi a ni.
Hmun remchang apiangah lirthei dahna – parking lot siam an tum tih minister hian sawiin, “Mi hausate a thlawna in sakna, lukhawng nei zui si lo PAHOSS ang kha ni loin, lirthei hunna ni bawk, sawrkar sum hnar ni bawk a tam thei ang siam kan tum. Kawngpui chu kea kalna tur leh lirtheia tlanna tur a ni a, lirthei hunna atan hman tlem tial tial tum a ni,” a ti.
Assam Rifles chhuahsan ram cheithat hna thawh tan theih a ni tawh tih a sawi a. AMC inthlanpui model code of conduct puan hmain bul an tan hman tawh tih a sawi a. State sawrkar lungrualpui thei AMC-ah a sawrkar a ngai tiin, “Lunglei Municipal Council inthlana kan solid tum aiin tuna AMC inthlan kan er hian, ZPM thli a na zawk a, a result erawh Pathian leh mipui kutah a awm,” a ti.