Budget nihna tak a lang dawn

April ni 1-ah sorkar kum thar a intan a, February ni 26-a Budget Session-a pharh Mizoram budget thar (2026-27) hman tan a ni. A hma chuan budget hi an lo thlir lawk a, tunah chuan a taka hman a ni tawh. A nihna tak a lan hun a ni ta.“Kum a thar a, kan budget nihna dik tak chu a lo lang ang,” Dr James LT Thanga, department of economics, Mizoram University chuan a ti a, leiba a tam tih te, inrelbawlna senso a tam tih te a lo lang dawn tih a sawi.
“Kan leiba hi a tam a, a pung lehnghal a. Tun ang zel kan nih chuan kan la buai ang tih a hlauhawm,” a ti a, “Inrelbawlna senso a pung chak a, hei hi vei tham a ni,” a ti bawk.
Mizoram leiba a tam thu a sawi a, “Leiba hi a tam lutuk, hetiang zat ba lo thei hi kan ni,” a ti a, tun hnaiah leiba a pung chu thil lawmawm lo a nih thu sawiin, budget thar enin a pung leh dawna a lan thu a sawi.
Mizoram leiba hi a pung a, 2023-24 chhunga leiba, outstanding debt (actuals) chu cheng vaibelchhe 12,082.26 niin, 2024-25-a leiba, outstanding debt (actuals) chu cheng vaibelchhe 14,637.72 a ni a, 2025-26 chhunga outstanding debt (RE) chu cheng vaibelchhe 16,917.12 ni tura chhut a ni.
Dr James LT Thanga chuan leiba a pun zel thu hi a sawi a, “Mihring tam lam enin kan budget hi a tam a. Mihring tam lam leh budget enin leiba hi a tam a. Rei lo teah cheng vaibelchhe 19000 a tling thei dawn lehnghal a,” a ti.
Mizoram Universal Health Care Scheme chungchang pawh a sawi a, “Kan health care scheme hian revenue expenditure a tipung a, inrelbawlna senso a tipung. Inrelbawlna senso pung hi a hma atanga kan buaina a ni,” a ti.
Thla thar leina chungchangah, 2026-27 chhung atan cheng vaibelchhe 79 a awm tia sawi theih a nih thu a sawi a, “Hei hi bana kaih policy chhunga mi a ni a, a hrana awm a ni lo. Engpawhnise chutianga tam a ni lo a, chuvangin hman tangkai thiam a ngai,” a ti a, kum liam taah budget-ah thlai thar leina tur sum dah a nih loh thu sawiin, SEDP-a sum hman bang kha a ni, a ti.