Card sena thun tiama campaign an lo awm – B Lalchhanzova

Card sena thun tiama
campaign an lo awm
– B Lalchhanzova
Aizawl Municipal inthlan turah ward thenkhatah candidate-ten ration card sena thun tiam an lo awm nia a hriat thu Supply minister B Lalchhanzova chuan a sawi a. Ration card chu party induhsakna awm lo turin inthun dan tur reltu khawtlang huap an awm tih a sawi.
AMC inthlan awm tur Ward No.VIII campaign khuhhawn a hmanpuinaah Aizawl East-II bialtu MLA ni bawk B Lalchhanzova chuan, mipui aiawha thlan nih tawh chuan an ti thei emaw thei lo emaw mipui ban phak an ni tur a ni, tia sawiin, “Politics dik chu huapzo a ni tur a ni a, ruling chauh tih bikte hi thil tha a ni loa, a par zu tlantu kan tam tur a ni. Ram dan huang pel loin min duhsaktu, kan mi leh sate chu engemaw kan ti ve ang, amaherawhchu a loa luakchhuak, ruling nih vanga inlek vung thinna rorel erawh kan kal pel tawh tur a ni,” a ti
Ration card chungchangah pawh sawisaktu nei ve pha lo, mual eng kil pha ve lo chhungkua, eng party mi leh sa pawh nise an chanvo an chang tur a ni tih chu a thupui a ni tih FCS&CA minister hian sawiin, “Sawrkar hmasate khan induhsakna avangin mi hausa deuh pawh card pawlah leh card engah an lo dah tih kan hmu chhuak a, siamthat hna kan thawk mek a, a khirh khawp mai. Ward thenkhat candidate-ten, ‘ration card senah ka thun ang che u,’ tia lo campaign tawk an awm a, a pawi hle in ka hria. An chhungkaw mila ration card siam dan tur hi khua leh veng tinah NFSA Committee din vek a ni a, party induhsakna awm lo turin tlawmngai pawl tin aiawh, all party ten fel takin ro an rel a ni,” a ti.