Inremna atana rawtna Tehran-in hnawl, Israel-Iran inbei nasa

Inremna atana rawtna Tehran-in hnawl, Israel-Iran inbei nasa
Tehran-in Strait of Hormuz a hawn duh loh lai leh US President Donald Trump-a’n hun a tiam chhunga inremna tura a thil phut an pawm a nih loh chuan ‘nasa taka chhut’ tuma a vau mek laiin Iran leh Israel chu nasa takin an inbei mek.
Hetih lai hian inremna tura hmasawnna ni thei turah Pakistan-a Iranian palai chuan indona tihtawp tura inremna siam tura Islamabad-in ‘a tha leh hlawk tak a rawtna’ chu ‘a pawimawh lai ber a hnaih tawh’ tih a sawi.
Pakistan ruahmanna anga US-in inkahhai puana strait dan hlih theih leh a hnu ni 15 atanga ni 20 chhunga remna zawnga indawr zui tura rawtna chu Inran chuan a hnawl niin sawi a ni.
Iran chuan rawtna hi a chhannaah clause 10 awmna a siam a, hetah hian he biala buaina tihtawp te, him taka Strait of Hormuz kaltlang theihna tur dan zam te, hrekna hlih te leh indona avanga in chhiate sak thatna tur pawh a tel niin IRNA news agency chuan a tar lang.
Thawhtanni khan Trump-a chuan ‘zan khatah ram pum hi tihchhiat vek theih a ni a, chu zan chu naktuk zan pawh a ni mai thei’ tiin Iran chu a vau a. Hun tiam hmaa Tehran-in a remti duh loh chuan Iran power plant leh infrastructure-te tihchhiat a tum.
Inremna a awm loh chuan Trump-a hian Nilaini zanlai (India-a Ningani zing dar 09:30)-ah chuan ‘Iran-a kawngpui zawng zawng chu tihchhiat vek a ni ang’ a ti a, “Iran-a power plant zawng zawng chuan hna a thawk thei tawh lo vang a, a kang ang a, a puak vek ang a, hman leh theih a ni tawh lo vang,” a ti bawk.
Thawhlehni zing hma takah khan Israeli sipaite chuan Tehran leh hmun danga Iran sorkar hmunhmaa beihpui an thlak an zo tih an sawi a. Iran atanga missile kahchhuahte kap thla turin air defence system an hmang ve bawk.
Israel chuan thurawn tichhuakin Iranian-te chu rela tlanchhiat tum lo tur leh Thawhlehni tlai thleng rel kawng atanga inthiarfihlim turin an ngen a. “Rel leh rel kawngpui bula i awm hian i nunna atan a hlauhawm thei,” tiin sipaite chuan X-a Persian tawngin an tar lang.
Saudi Arabia chuan khawchhak lam lam pana ballistic missile kah chu an lo kap thla a, energy hmunhma bulah a tla niin a defence ministry chuan a sawi a, tute kah nge a sawi lo thung.
February 28-a US leh Israel tang dunin Iran laka indona an kalpui atang khan Iranian missile leh drone za tam takin lalram hi beih a ni tawh a, a tam zawk chu an lo dang niin thuneitute chuan an sawi.
Bahrain, Saudi Arabia leh United Arab Emirates te chuan Thawhlehni khan a rualin mipui himna hriattirna an tichhuak a, Saudi Arabia leh Bahrain inzawmna kawngpui chu fimkhurna atan hun rei vak lo khar a ni bawk.
Vantlang thilte beih a nih mek lai leh Trump-a’n Iran power plant tihboral a tiam laiin UN-a Iran palai chuan Thawhtanni khan beihpui thlaka vauna chu ‘khawvel dan hnuaia indonaa dan palzutna chiang tak’ tiin a sawi.
Trump-a hun tiam a thlen hnaih zel laiin tuialhthei man chu barrel khat $110 vel a ni tawh a, khawvel hmun hrang hranga thil man a sangin tuialhthei phurhna kawng pawimawh, Strait of Hormuz chu hawn leh mai beiseina tur a la awm lo zel.
Indonaah hian Middle East ram hrang hrangah mi sang tam tak an thi tawh a, Iran-ah mi 3,546 an thi niin US-a mihring dikna chanvo humhalhtu pawl, HRANA chuan a sawi a, Israel-in Lebanon-a Iran thlawp Hezbollah a beihnaah mi 1,500 vel an thi bawk.