Kawr 55 ha chunga half marathon tlanin record a siam

Fort Smith, Arkansas, USA a cheng, Meredith Smith chuan T-shirt 55 hak thuah chungin half marathon (km 21) a tlan a, hmeichhe zinga half marathon tlannaa kawr 55 ha chunga tlan thleng rang ber record a siam. A hmaa hetiang record siamtu chu USA nula tho Jennifer Romano a ni a, Meredith hian March thla khan Fort Smith Half Marathon chu darkar 3:30:00 a tlan chhuakin Jennifer-i record hi a rawn khum ta a ni.
Meredith hian record siam tumin a inbuatsaih nasat thu a sawi a, “Hetiang tlan record ka siam hi ka tan a hlu lehzual a ni, 2013 khan tlan hi bul ka tan ve chauh a, chutih lai chuan record siam hi rilruah a langpha teuh lo, ka rihna tihhniam nana ti ve chauh kha ka ni. Tunah T-shirt hak thuah tun chunga ka rihna tipung zawk chunga record ka siam ta hian ka lo beih nasat ve tawh zia a rawn pholang a ni. Tlan ka tuipui ve tan atanga vawiin thlenga ka kawng zawh lawmman a nih rualin, kan thawhrim phawt chuan kan hmachhawp te hi tih theih loh tak tak a lo awm bik lo tih entirna tha tak a ni bawk ang,” a ti.
Record siam tur a inpuahchahnaah Meredith hian T-shirt 80 ha chunga tlan te a zir thin a, tum khata T-shirt 80 ha chunga taln chu thil har tak mai a ni a, chuvangin record siam nan pawh a hmang thei lo, Meredith hian kum 10 chuang tlan hi a rihna paih nan a lo hmang tawh a, hetih chhung hian a rihna pawh kg 36 vel zetin a tihniam tawh niin a sawi.
Tichuan le, half marathon tlan hun chu a lo thleng ta, Meredith chuan T-shirt 55 a hak thuah tun mai a, starting line-ah a intlar ve ran mai a, chutiang khawpa tam kawr hakthuah chuan a taksa pawh a phuar lo thei lo a, a rihna a tihbelh nasa viau a, a taksa a tilum nasa lehzual bawk. Heng zawng zawng hi tuar chhuakin, darkar 3 leh miute 30-ah km 21 a thui a tlan chhuak hman ta a ni.