Tourist ho dawnsawn chungchangah Tourism minister leh CYMA inkawm

Mizoram tlawha rawn zin ho lo dawnsawn leh a kaihhnawih chungchangah Tourism minister Lalnghinglova Hmar chuan Zirtawpni khan Central YMA hruaitute a kawm. Tourism minister chuan, Mizoram tlawhtu pung zel chu sum leh pai leh a tha zawnga state tarlan kawngah thil lawmawm tak a nih rualin, thil tha lo ken tel a neih theih avangin fimkhur taka lo dawnsawn a tul tih a sawi a. 2025 September 13-ah Sairang thleng rel a lo lut a, October atang khan chawhrualin thla khatah mi nuaikhat chuang tourist kan la nei ziah tih a sawi.
“Kum 2025 chhungin tourist nuai 8 chuang an awm a, kuminah a aia tam an awm kan ring. Kan culture leh khawtlang nunphung ti dal si loa mikhual kan lo dawnsawn a, inven tulna kawngah kan lo inven theihnan nasa taka inzirtir a ngai a, YMA nen thawhho kan duh a ni,” a ti.
Tourism chu an tih fuh chuan Mizoram tan industry lian ber pakhat a ni thei tih minister hian a sawi a. Kan zavaia min nghawng avangin a dawnsawn kawngah pawh tanrual vek a ngai tih a sawi. Council of Churches in Mizoram leh PCI Mizoram Synod hotute nen hemi chungchangah hian an lo inkawm tawh a, kohhran dang leh NGO dang nen pawh inrawnkhawm neih zel tum a ni tih a sawi bawk.
Central YMA president R Lalngheta chuan Mizoram rawn tlawhtuten hun hlimawm leh nuam tak hmang se an duh a, chutihrualin a sahawk lutuk leh a ram neitute awm tinuam lo zawnga khawsa an awm palh thei tih a sawi a. Chutiang a thlen lohnan Mizoram mipui bakah tourist-te hriat tur pawimawh, an cham chhunga an tih tur leh tih loh tur (dos and donts) mumal tak siam tha a tih thu a sawi.
Inkawmhonaah hian inzirtirna kalpui chungchanga sawrkar leh Central YMA thawh dun theihna sawi a ni a. Tourism kaihhnawiha eizawng hrang hrang bakah tourist-te hriat tur pawimawh buatsaih leh sem thin a nih thu leh, YMA-in ngaihpawimawh zawng a neih chuan sawrkar a inhawn thu sawi a ni.
Mizorama tourist site hrang hrangte hlutna leh nihna phochhuak tur leh, tourist-te pawhin hlawk leh tangkai zawka hun an hman theihnan tour guide training kalpui mek a ni tih sawi a ni a. Homestay hman dan dik tawk lo awm thin chungchang, Inner Line Permit leh Protected Area Permit kalpui danah tourism thlirna atanga rawtna awmte sawiho a ni. YMA branch hrang hrang atangin tourist-ten harsatna an tawha an contact theih tur inruat theih a ni em tihte pawh sawiho a ni bawk.
Ram leh hnam tana hmasawnna turah chuan sawrkar tichak a, thawhpui turin an inhawng a. Ziaka thawhhona tur memorandum of understanding chungchang pawh an lo ngaihtuah tur thu Central YMA hruaitute hian an sawi a ni.