Ruihhlo awm lohna district-ah Lawnglai district siam an tum
Ruihhlo awm lohna district-ah
Lawnglai district siam an tum
Sawrkar laipuiin ruihhlo tih rehna tura a kalpui – Nasha Mukt Bharat Abhiyan hnuaia beihpui thlakna ‘ Drug Free District Campaign’ chu Zirtawpni khan District Level Committee on Drug Free District huaihawtin Lawngtlaiah hawn a ni.
A hawngtu LADC chief executive member Donny Lalruatsanga chuan, Lawngtlai district chu international border-a awm a nih angin, ruihhlo lo luh theihna a tam hle a, hei vang hian ruihhlo do kawngah pawh chak leh uar zawka thawh a tul tih a sawi. Ruihhlo awmlohna district-a puan chu thil awlsam a ni dawn lo, tiin, “Sawrkar, VC, NGO, kohhran leh mipui tan tlan leh thawhho a ngai dawn hle a, theihtawp chhuahin thawkho ang u,” a ti.
Ruihhlo do kawngah fimkhur taka hma lak a tul hle tih a sawi a. Ruihhlo zuartu leh ruihhlo bawiha tang mekte chhanchhuak turin sawrkar, NGO leh kohhran ten theihtawp chhuah tawh thin mah se, tha thlah theih a ni lo tih hria a, thahnemngai taka thawh zel chu thil pawimawh hmasa a ni tih a sawi a ni.
District Level Committee on Drug Free District Lawngtlai chairman, bawrhsap Donny Lalruatsanga chuan, an thil hawn chu Mizoram sawrkar hmalakna piah lamah sawrkar laipui hmalakna pawimawh tak a ni, tiin, central atanga sum leh pai local chu ruihhlo tirem tura hmalakna a nih angin Lawngtlai district chu ruihhlo awmlohna ‘Drug Free District’ a siam tura theihtawp chhuah a ni dawn tih a sawi a ni.
Report-a tarlan danin, Lai Autonomous District Council huamchhunga khua 99, Chakma ADC huamchhunga khua 88, a vaiin Lawngtlai district-a khua 187-ah ruihhlo awm lo tura hma lak a ni dawn a. Drug Free Campaign hi kum thum chhung atan kalpui tura duan niin, a tul anga pawhsei theih a ni ang. District level, block level leh village level-ah Committee din tur niin, mahni thuneihna zawn theuhah hma lak tur a ni dawn a. District administration hriatpuia Drug Free Village-a puante chu Independence Day apiangin Certificate of Recognition leh citation hlan an ni dawn a ni.