2 Mizo Bn NCC cadet-ten nunchan zir

2 Mizo Bn NCC cadet-ten nunchan zir
2 Mizo Battalion NCC (National Cadet Corps) chuan 2nd MAP Complex Luangmual Lungleiah NCC cadet-te tan April 6-15 chhung awh tur Combined Annual Training Camp (CATC-56) an buatsaih.
CATC-56-ah hian Junior Division (JD), Junior Wing (JW), Senior Division (SD) leh Senior Wing (SW) cadet 241 telin, a zatve (50%) dawn chu hmeichhia an ni. Camp commandant Col. Sagar K Mohanty chuan cadet-te fuihna thu sawiin camp hi a hawng a. 23 Assam Rifles officiating commanding officer Lt Col. Sahibjit Singh chuan cadet-te hmaah sipai (Armed force) a luh dan kawng hrang hrang a sawi. NCC cadet lo ni tawh thin, Lunglei DIPRO C Lalhruaitluanga chuan media pawimawhna leh media hman dan tha bakah internet kaltlanga pawikhawihna (cyber crime) laka himna chungchang a zirtir bawk.
CATC-56 hi May-a Lungleia buatsaih tur, NCC Grand Fest & Parasailing Camp atana inpuahchana a ni nghal a. Ni 10 camp chhung hian NCC cadet-te hian sipai lam (drill), silai leh ralthuam chelek, ram lem (map) en dan, ramhnuaia chettlat dan, infiam leh taksa sawizawi, hruaitu tha ni tura thil pawimawh leh khua leh tuite mawhphurhna hrang hrang an zir dawn a. Mi thiam sawm bikten thupui hrang hrang – POCSO Act, kangmei laka himna leh chhiatna thlen thulha chet lak dan, vaihlo leh ruihhlo that loh zia leh thupui pawimawh tak tak hmangin cadet-te fuihin an zirtir thin bakah hnam ziarang pho chhuahna hun buatsaih a ni bawk.