Intih Mizo derna awm lo se – MZP president

On Apr 11, 2026 1 0

Intih Mizo derna awm lo se
– MZP president
MZP chuan Zofa unaute theihtawp chhuaha lo kuangkuah chu an tih tur a nih rualin, Mizo hming pua thangthat lak tum, intih Mizo derna awm tawh lo se tih chu MZP duh dan a ni tih an president Dr C Lalremruata chuan a sawi.
Mizo Zirlai Pawl rorelna sang ber dawttu, Federal Council vawi 60-na (2025- 2027 termah a vawi khatna) chu Zirtawpni khan Aizawlah neih a ni a. House leader, MZP president Dr C Lalremruata chuan, zirlai pawl leh college-ah hruaitu kan nih chhung chuan zirlaite tana tha tur, zirlaite hmasawnna tur leh ram leh hnam hmasawnna tur thil ngaihven lehzual turin a sawm tih a sawi. “Kan zirna a that phahna tur leh kan ramin hma a sawnna tur, kan ramin a hlawkpuina turah chuan engpawh ti dawn ila, MZP chu kan inring reng tur a ni,” a ti.
Tunhnaiah Mizoramah hnamdang (Vai) phalna neiloa lokal an tam tih sawiin, kan hnam inhungbikna ILP venhim chu mitin mawhphurhna a ni a, tlang hrang hranga MZP hruaitute pawh kan hnam, kan ram a him theihna turin kan chhehvel hrechiang lehzual a, kan inhumhimna ILP hmang tangkai tur leh check ngun lehzual turin an inngen tih a sawi a ni.
MZP danbu-in a sawi angin ‘Pi leh pute atanga Zofate luah chin ram rorelna pakhat hnuaia awm’ tih chu MZP-in a kal pui reng tih MZP president hian a sawi a. “Tunhnaiah mi tam zawkin Mizo inti duhlo inlo kuahkuah reng a ngai em ni, tih zawhna kan dawng tam hle. MZP chuan kan unaute theihtawp chhuaha lo kuangkuah hi kan tih tur a ni a, chutih rual chuan Mizo hming pua thangthat lak tum, intih Mizo derna hi awm tawh lo se tih chu MZP duh dan a ni. Zofate hi kan inhmangaih tlat loh chuan hmangaihtu kan nei chuang lo tih hi Zofa zawng zawngin hre thar leh turin ka sawm a ni,” a ti.
MZP Federal Council vawi 60-na chuan a tul anga hmalak chhunzawm turin heng hi a pawm – Mizoram-a inner line permit (ILP) hman dan kalphung (system) chu tun aia khauh zawk leh changkang zawka kalpui a nih theihnana hma lak; zirtirtu indaihlohna rualkhai zawka phuhruk/ semrual a nih theihnan nasa zawka hma la tura sawrkar nawr; Mizoram State University din turah dik leh felfai taka hna lak a nih theihnana hma lak; zirna In hrang hrangah Zo nun zemawi inzirtirna kalpui a nih theihnan hma lak, tih a tel.
Mizoram University-in MZU Sports a buatsaih thinah tun aia budget a tam theihna tura hma lak; Common University Entrance Test (CUET) UG/ PG Exam Center tam zawk Mizoram-ah a awm theihnana hma lak; Mizoram college zawng zawngin principal nghet an neih theihnan a tul anga hma la tura sawrkar nawr, tih pawh a tel a ni.