MUHCS zawm ve turin MLA/ex MLA ngen

MUHCS zawm ve turin MLA/ex MLA ngen
Health care scheme kalpui mek Mizoram Universal Health Care Scheme chu zawm ve mai turin MLA nilai leh ni tawhte an ngen tih Mizoram Transformation Movement chuan an ngen.
Mizoram Transformation Movement (MTM) thuchhuak chuan, mipui mimirin MUHCS empanel hospital ni loa inenkawl chungchangah harsatna an tawh mek laiin, ram hruaitute – MLA leh ex MLA ten MUCHS-ah contribution pe ve mah se, MUHCS hi an zawm lo tih a sawi a. An ni chuan eng hospital-ah pawh, empanel loh hospital – ram chhung leh ram pawnah pawh lut se, an damloh inenkawlna senso zawng zawng hi an bill vek theitih sawiin, ‘MLA leh minister, ex MLA-te hian MUHCS hi a tha hlea an hria a nih chuan zawm ve ngei se, damlo mangang leh chhungkaw harsa tam takin an bill theih lohna hospital-a awm a ngaih si hian, anni’n an duhtawka an lo bill thei hi a dik tawk lo hlein kan hria a. Ram hruaitu an nih angin mipui tan entawntlak leh hmahruaitu zawk ni turin kan beiseiin kan ngen a ni,’ a ti.
Sawrkarin MUHCS a siam chu a lawmawmin hmang tangkaitu tam tak awm tawh mah se, mipui tam zawk tan ban phaka a awm theihnan harsatna la awm chu a rang thei ang bera chingfel turin sawrkar an ngen tih a sawi a. Pensioner-te chu subscriber pangngai aia sum thawh tam zawk ni si an chanvo paih then sak an nih avanga lungawiloin sawrkar an nghah mek thu sawiin, ‘Pensioner-te hi an that lai hun tam ber sawrkar tan an tha leh zung lo seng tawh an ni a. MUHCS hnuaiah mipui nawlpui ai pawhin an thawh zat a tam zawk avangin, an dinhmun hi an phut angin MUHCS 1.0 ang talin dah sak leh nise, tiin an thil ngen hi kan thlawp a ni,’ a ti.
Contribution pek hma pawha medical reimbursement bill theihna neisa sawrkar hnathawkte tan, empanelled hospital a tlem tak avang leh non-empanelled hospital-a emergency thila an inenkawl a ngaih changin reimbursement an hmuh tlem bakah an duhna hospital-ah pawh an kal hleithei tawh lo tih a sawi.
Sawrkar hnathawkten MUHCS awm hmaa an duhna hospital-a kal a, MR an bill thin ang khan, an duhna leh mamawhna hospital-ah kal a, cashless-a an kal theih lohna hmunah pawh MR an bill phalsak a tul, tiin, sawrkar hnathawkte entitle sa a nih bakah MUHCS atan sum an thawh that avangin an dinhmun siamthat sak an phu tih a sawi a ni.
Mizoram-a private hospital tha leh lian tam berah MUHCS hman theih a la nih loh avangin, heng hospital-a loh theih loha luh ngai tan MUHCS hman theih a ni lo tih MTM hian a sawi a. Private hospital-te chu Aizawla hospital khum awm zawng zawng zatve aia tam mah an ni bawk si nen, khum changlo damlo serious hnua khum zawn ngai an tam hle tih a sawi a ni.
‘Damlo zai ngai pawhin sawrkar hospital-ah phei chuan thla hnih chuangte nghah a ngai tawh a. Mizorama private hospital empanelled lohah damlo an luhin bill theih loha a awm hi a dik lo. Mizoram Health Care Society-in empanelled hospital list a tih chhuahah ‘deemed empanelled hospital’, cashless hman theih lohna, MR bill theihna chauh hospital list a dahah hian Silchar-a hospital, Shillong-a private hospital leh Guwahati-a hospital pawh an tel a. Hnam dang private hospital zawka tih theih si, Mizoram entreprenuer-ten an siam private hospital-a phal a ni ve lo hi a dik lo hlein kan hria a, sawrkar hian rang takin ngaihtuah tha leh se kan duh,’ a ti.
Emergency-a damlo, empaneled loh hospital a lut chu an bill leh thei ang, tih a nih rualin, an bill theih a tlem em em tih a sawi a. Hei hian MUHCS-a inziahluh a ti manhla lo hle tih sawiin, emergency-a non-empanelled hospital-a luh ngaiten an bill lehin an bill theih tlem lutuk chu ennawn nise, an bill atanga a chanve tal an hmuh let leh theihna turin sawrkarin hma la se, a ti bawk.