MNF-in an sawrkar chhunzawm chuan tih tum pawimawh sawi

MNF-in an sawrkar chhunzawm
chuan tih tum pawimawh sawi
MNF party chuan Aizawl Municipal Corporation-a sawrkarna an chan chhunzawm a nih chuan tih an tum pawimawh zual an sawilawk.
MNA AMC candidate R Lalnunthari chuan thuthar thehdarhtute hnenah MNF a sawrkara tih an tum hi a sawi a. “MNF chuan Aizawl hmasawn zawk, changkang zawk leh mipui mimir hrim hrim pawh dinhmun sang zawka hlankai tumin kan inruahman a ni,” a ti.
AMC inrelbawlna tha zawk leh chak zawk siam tumin, local council leh Ward Committee mawhphurhna a mumal zawk theihnan ruahmanna siam a ni dawn tih a sawi a. AMC hnuaia development hna thawh reng reng kut tling leh mawi, belhchian dawl a nih zel theihnan hma lak chhunzawm a ni dawn tih a sawi.
AMC sawrkar chak zawk leh langtlang din chhunzawm tum a ni, tiin, “Thawktu indaih loh avanga hna muang thin tih ziaawm a nih theihnan thawktu lak belh tum a ni ang,” a ti.
Aizawl khawpuiah khualzin leh pem lut kan pun zel avangin mumal zawka inawp theihnan Aizawl khawpuia cheng dik takte chhinchhiahna (population registration) uluk zawka kalpuiin – nau piang, mitthi leh pem lut chhinchhiah a ni dawn tih a sawi a. AMC Licensing Regulation 2012 chu ram leh hnam himna tur leh Mizo sumdawngte tana hamthatna turin ennawn an tum tih a sawi a ni.
Aizawl khawpui veng hrang hrang leimin leh lei tlahniam laka a him zawkna turin tuihawk luankawr tha zawk leh a khuhna (drain cover) siam belh zel tum a ni tih a sawi a. Khawpui a lo ralmuan lehzual a, rukru leh misual laka mipui himna atan leh hnu chhui awlsam zawknan local council area hrang hrangah CCTV tam thei ang dah belh zel an tum dawn tih a sawi bawk.
Aizawl khawpui faina leh mawina (beautification) lam hawia hmalakna kal mek chhunzawm zel a ni dawn, tiin, Aizawl khawpui kawtchhuahah ‘Aizawl Gate’ mawi tak siam a ni dawn tih a sawi.
Aizawl khawpui bawlhhlawh paih leh sawngbawl lamah tan la in, bawlhhlawh tihral dan mumal leh tha zawka kalpui tum a ni dawn tih a sawi a. Aizawl khawpui veng thenkhat lirthei luh theih lohnaah bawlhhlawh paih dan mumal zawk ruahman a ni dawn tih a sawi a ni.
Aizawl khawpui ‘Plastic Free City’ a puan tawh chu a hlawhtlin zel theihnan chak leh felfai zawka hma lak chhunzawm a ni ang, tiin, bawlhhlawh (solid waste) paihna hmun siam belh tura hma lak bakah bawlhhlawh tawih thei hmanga lei tha (bio-fertilizer) siam tura hma lak chhunzawm zel a ni dawn tih a sawi.
Ran vulh leh ran khuahkhirh chungchangah local council-te berawnin mipui zawh tawka hma lak chhunzawm zel a ni dawn tih an sawi a. Mipui hrisel zawkna atan Aizawl khawpuiah sa leh thlai thianghlim chauh zawrh a nih theihnan hma lak zel a ni dawn tih a sawi a ni.
Aizawl veng tin deuh thaw in veng chhung Inrinni zing bazar kan neih chu eizawnna leh innghahna pakhat a nih tawh avangin, mipuiin awlsam zawka chawhmeh kan lei theihnan vengchhung bazar tam zawk siam tum a ni dawn tih a sawi a. Aizawl khawpuia septic tank khat tawh paih faina /ek paihna hmun siam belhin tuna kan neih mek hi tih-changtlun a ni dawn tih a sawi bawk.