State pali din champha lawm

On Apr 13, 2026 5 0

State pali din champha lawm
‘Ek Bharat Shreshtha Bharat’ hmalakna hnuaiah Mizoram larsap Gen. Vijay Kumar Singh (Retd) hoin April 10 khan Bihar, Rajasthan, Odisha leh Himachal Pradesh state din champha chu Lok Bhavan-ah lawm a ni.
Larsap chuan, state danglam bik leh pawimawh tak tak pali – Bihar, Rajasthan, Odisha leh Himachal Pradesh din champha lawm pual hian duhsakna a hlan tih a sawi a. Heng state chanchin langsar leh chhuanawm sawiin, “State tin hian danglam bikna an nei theuh a, thatna riau an neih bakah theihna nasa tak an neih avangin hmasawnna nasa takin heng state-ah hian a thleng a ni,” a ti.
Ek Bharat Shreshtha Bharat hmalakna fakawm a tih thu a sawi a. State/UT-te din champha inlawm sak tawn thin hmang hian midangte hnam ziarang, nunphung leh tih dan kan hriat thuk lehzual phah tih a sawi. “Hei hian inpumkhatna siamin India chu ram danglam bik a nih zia a lantir a ni,” a ti.
Danglamna nasa tak kara kan inpumkhat tlatna chu kum 2047-a ram changkang leh intodelh, ‘Viksit Bharat’ a India siam tura hmanraw pawimawh tak a ni tih a sawi bawk.
Bihar larsap Lt. Gen. (Retd) Syed Ata Hasnain, Rajasthan larsap Haribhau Kisanrao Bagde, Odisha larsap Dr Hari Babu Kambhampati leh Himachal Pradesh larsap Kavinder Gupta te thuchah bakah state pali chanchin tarlanna video tawi thlirho a ni a. NIT Mizoram asst. professor Dr Saurav Suman (Bihar), NIT Mizoram asst. professor Dr Nidhi Yadav (Rajasthan), MZU pro vice chancellor Prof Pravakar Rath (Odisha) leh College of Veterinary Sciences & Animal Husbandry Mizorama zirlai Sonali (Himachal Pradesh) ten an state chanchin an sawi a. Mizoram University, NIT Mizoram leh Govt. Mizoram Law College zirlaiten hnam lam leh zai an entir a ni.
1912 March 22 khan Bengal Presidency atangin Bihar a piang a. Rajasthan hi 1949 March 30 khan Jodhpur, Jaipur, Bikaner leh Jaisalmer lal ram inzawmkhawm chuan siamin Greater Rajasthan tia vuah a ni. Odisha hi tunhma chuan Bihar hnuaiah awmin, 1936 April 1 khan state puitlinga hlankai a ni a, tawng hman behchhana India rama state piang hmasa ber a ni. 1948 April 15 khan Himachal Pradesh hi Indian Union hnuaia Part ‘C’ state ni turin a piang a. 1971 January 25-ah state puitlinga hlankai a ni.
Ek Bharat Shreshtha Bharat programme hian India rama state leh union territory-a cheng hnam hrang hrang, hnam ziarang leh nunphung inang lo tak tak inkarah inpawhna leh inunauna tha zawk, hnam ziarang inhriatpawh tawnna kaltlangin siam a tum a ni.