Hmeichhe bial hauhna sawi turin parliament special session ko, Cong-in tul rih lovah ngai

Hmeichhe bial hauhna sawi turin parliament special session ko, Cong-in tul rih lovah ngai
Sorkar chuan Ningani atanga Inrinni thleng tawh turin parliament special session a ko va, hei hi kum 2029 Lok Sabha inthlanpui neih hmaa hmeichhiate tana bial hauhna dan kalpui tumna, Constitutional Amendment Bill siam tum a ni dawn a. Congress party chuan hun rih lovah a ngai.
Session neih hma hian rorel lai, BJP chuan Lok Sabha leh Rajya Sabha-a an member-te chu sawiho chhung zawnga awm rorelna ina awm reng turin a hriattir a. MP-te chu hi khauh taka zawm turin a hriattir a, ni thum chhung hian chawlh a phal lo.
Prime Minister Narendra Modi-a chuan house pahniha floor hruaitute hnena lehkha a thawnah hmeichhe tana bial hauhna dan, Nari Shakti Vandan Adhiniyam tia hriat hi ‘ngaihdan dik tak’ hmanga kalpui a tul thu a sawi a. Kum 2029-a Lok Sabha leh assembly inthlan neih turah hmeichhiate tana bial hauh tawh a pawimawh thu sawiin, siam that ngaite pawm tura party zawng zawngte rorelpui turin a sawm.
He dan hi kum 2023-a pawm tawh a ni a, Lok Sabha leh state assembly-ah hmeichhiate tan 33% bial hauh a ni a. Lok Sabha bial 816-a tihpun a rawtna a awm bawk a, 273 chu hmeichhiate tan dah tur a ni a. Tun dinhmunah chuan kum 2027 chhiarpuia mihring awm zat milin bial ramri siam tura duan a ni a, heti a nih chuan kum 2034 thlenga tihkhawtlai theih a nih hmel a, sorkar erawh chuan kum 2029 inthlanpuia hman hman a tum thung.
Eptute erawh chuan he rawtna hi an sawisel nasa hle a. Congress President Mallikarjun Kharge-a chuan prime minister hnenah lehkha thawnin state inthlanpui neih mek karah sorkar chuan ‘politic-a thil thar’ a kalpui hmanhmawh lutuk niin a sawi a. Dan ennawna siam that nena kaihhnawiha bial ramri siam that chungchang sawiho tura April 29 hnu lama all-party meet neih a phut thu a sawi nawn leh bawk.
Kharge-a chuan bill hi kum 2023-a lungrual taka pass a nih laiin sorkar chuan inrawna zau zawka ngaihtuahna sen a tul nia sawiin a hmang nghal lo tih a sawi a. Bial ramri siam thar leh thil pawimawh dangte chiang taka hriat a nih loh chuan dan ennawna siam that chungchangah awmze nei taka thil sawiho a theih loh tur thu a sawi bawk.
Sorkarin political party-te a biakrawn thu a sawi pawh ‘thu dik dodalna’ a nih thu a sawi bawk a, eptu party-te chuan inthlanpui neih mek zawh hnuah inrawnkhawmna zau zawk neih an phut fo thu a sawi zawk a. Kharge-a chuan hetiang danpui thlak danglamna hian sorkar laipui leh state sorkar a nghawng phak dawn tih sawiin a nghawng tur zawng zawngte pawh an tel ve a ngai tih a sawi.
Congress chuan West Bengal leh Tamil Nadu bakah state dangah inthlan laia special session koh pawh a hun loh thu a sawi bawk a. Party chuan he thil hi rang taka pass ai chuan ngaihtuahna zau zawk a ngai niin a ngai.