City in Chelsea an sawp

Pathianni zan khan English Premier League khelh chhunzawm a ni a, Manchester City chuan Chelsea an khelmuala Stamford Bridge-a ngei 3-0 ngawtin an sawp a, Arsenal nen an inkar an tizim. Khingpui hautak zinga mi Chelsea an sawp vangin City in champion theih beiseina sang zawk an nei thar. Awlsam taka City an chak laiin London club lian Tottenham an tlawm leh thung a, relegation zone-ah an awm der tawh.
City an vung
Inrinni zana table-a hmahruai mektu Arsenal chu an khualmualah ngei an tlawm. Arsenal tlawm hi City tan chanchin tha a ni a, Chelsea hneh turin tumruhna an nei lian leh zual. Arsenal nen an inkar tihzim theihna hun tha chhawr tangkai ngei tuma tan khawh an ni bawk a, Stamford Bridge-ah vung taka kalin, team lian Chelsea lakah awlsam takin point thum an hlawhchhuak.
Top 4 huang luah phak hram tuma tan khawh Chelsea hian an mikhual City lakah bul an tan tha a, chawlhlawk hmain chak phu zawk an ni. Blues tan hian defender Marc Cucurella chuan hmahruaina goal a thun a, mah se a lo offside vangin a goal thun hi pawm a ni lo thung. Chawlhlawk hma hian Chelsea tan Joao Pedro chuan goal thun theihna hun tha a neih chu uiawm takin a hlah ve bawk. City pawhin hlauhawm siam bawk mah se chawlhlawk hmain goal thun thei an awm lo.
Chawlhlawk hnu lamah inkhel a hmuhnawm zui leh a, City an khel tha ta viau a, second half hi chu Pep Guardiola team chan a ni deuh chawt tawh. Secon half tan atanga minute rukna lekah Ryan Cherki ball vawrh luh tha tak chu Nico O’Reilly chuan minute 51-naah awlsam takin a tauh goal a, hmahruaina goal a thun.
Hmahruaina goal an thun vangin City an phur a, goal thun belh ngei tumin an khingpuite an nawr na zui hle. An khingpuite nawr let hlei thei lova, an lama bet deuh tlat Chelsea hi tlarhnung chu City mawi takin an thiat nawn leh ta nge nge. An goal khatna siamchhuaktu Cherki chuan Chelsea player a bum kual hnuin Marc Guéhi tan fuh leh fing takin a siam. Liverpool aia Manchester City thlangtu Guehi hian fuh taka ball a dawn hnuin striker goal thun ni mai awma mawiin lei hrulah a pet goal a, minute 57-naah an goal hnihna a thun a, an hmahruaina a tizau leh zual.
Si hnih an phurh hnuin Goal thun tum viau mah se Chelsea in ball an chang hleithei meuh tawh lova, awm ze neiin an khingpuite an nawr thei meuh tawh lo. Goal thun an mamawh em em laiin an chesual leh tlat thung a, goal an chhuah belh ta cheu zawk. Chelsea midfielder Moises Caicedo chuan si nghak Sanchez hnen atanga ball a dawn chu a khalh sual a, amah bawrtu City player pathum lakah talbuaiin ball a hloh. Caicedo ball chhuhsaktu Jeremy Doku chuan chak takin a khalh tlang a, minute 68-naah an goal thumna thunin, an hmahruaina a tizau leh zual.
An mualah ngei goal thun chhuah tawh mah se Chelsea in hun tawp thlengin goal an thun thei lova, Stamford Bridge-a an mikhual Manchester City lakah 3-0 ngawta tlawmin, an mualah ngei an mualpho. Chelsea lakah an chak vangin City in Arsenal nen an inkar an tizim a, khelh khata khel tlem zawk chungin point 6 chiahin an thlau tawh. Kartawp hian City leh Arsenal te hi an inkhel zui dawn nghe nghe a. An mualah an chak a nih chuan City hian champion theihna hun tha zual zawk an nei tura ngaih a ni.
Spurs an buai zual
Pathianni zana inkhel dangah London club lian Tottenham chu mikhual an nihna hmunah Sunderland hneh lovin an tlawm a, dinhmun chhe leh zual zawkah dingin, tlahniam thei dinhmunah an ding der tawh. Sunderland lakah 1-0 a tlawm Spurs hian khelh 32 atangin point 30 an hmu a, 18-naah an awm mek. An chung chiaha awm West Ham nen point hnihin an inthlau.