Lawngtlai district-ah sentut hri a len lohna turin inralring

Bangladesh rama sentut (measles) leng mek laka fihlim theihnan a inven dan leh inralrin dan tur ngaihtuahin Nilaini khan Lawngtlaiah district bawrhsap Donny Lalruatsanga
kaihhruaiin hriselna lama thawktu, a kaihhnawih sawrkar hotute leh khawtlang hruaitute an tel.
Bawrhsap chuan, sentut vangin Bangladesh-ah tun thlengin nunna za aia tam an chan tawh a, lo inralrin leh tih tur tul ang ang lo tih lawk chu hna hmasaa neih a ngai tih a sawi. Lawngtlai district chu Bangladesh nen ramri nei a nih angin hri lo leng lut thei reng a ni a, medical team bakah Lawngtlai district mipui lo inralrin a tul tih a sawi a ni. A bikin, naupang kum 5 hnuailamin an vei nasa thin a, measles and rubella vaccine lak a pawimawh takzet tih a sawi bawk.
Ramria awm khua ho an fimkhur zual a tul hle, tiin, fimkhur kawngah khawtlang hruaitute theihtawp chhuah turin a ngen a. Khawsik, hritlang awm na – hnaptui tla leh mit sen, taksa a sena bawl chu a lanchhuana ber a nih angin, hetiang natna vei an awm chuan a ranglama inentir turin a chah a ni.
Senior chief medical officer Lawngtlai Dr Lalmuanawma Jongte sawi danin, vaccine lak that chu invenna tha ber a ni a, 95% aia tam MR Vaccine la ngei tura hma lak a tul. Vaccine chu naupang (thla 9-12) leh (thla 16-24) hnenah pek thin a ni a, dose hnih pek thin a ni.
Sentut chu measles virus-in a thlen a, boruakah a leng thei a ni. Sentut laka invenna atan chak zawka surveillance kalpui a ni dawn a. PHC leh CHC ah Rapid Response Team tih nun vek tawh niin, Mobile Vaccination Team an inralring tawh a. Tun dinhmunah MR Vaccine leh Vitamin A mamawh zat kawl mek a ni tih a sawi.
World Health Organisation atangin Dr Lalhlimpuii chuan hma an lak dan a sawizau a. Lawngtlai district-ah hian nikum January leh February khan sentut a leng a; theihtawp chhuah a nih angin nunna chan an awm lo. Vaccine la kimlo an awm thin tih a sawi a, chak zawka hma lak mek a ni tih a sawi. Kumin bikah sentut vei an awm lo.