AMC-ah chuan enchhin tawh lo ang u – Dr R Lalthangliana

ZPM chu state sawrkarah an insawi lo ang zela an awm avangin AMC-ah chuan enchhin tawh lo turin Aizawl mipui a ngen tih MNF hruaitu Dr R Lalthangliana chuan a sawi.
AMC inthlan tura an party tana a campaign-naah MNF senior vice president Dr R Lalthangliana chuan, tuna Aizawl khawpui kawng pawimawh zual resurfacing hna thawh mek chu lawmawm a tih rualin, MLA inthlanpui campaign laia Pu Lalduhoma leh a hoten an duh loh leh sawisel nasat em em, restricted tender hmanga ZPM sawrkarin a thawhtir a ni tih a sawi. “Pu Lalduhoma leh a pawlte hi inthlan campaign laia an sawi loh ang hlirin an awm a. Enchhin fuh loh zia mipuiin kan hre tawh. AMC-ah hi chuan enchhin tawh lo ang u,” a ti.
Aizawl khawpui kawng chu eng sawrkarah pawh a khat tawka thuamthat reng thin a ni, tiin, “Tuna ZPM sawrkarin kawng a thuamthat mek hi chu, central atanga sum an hmuh emaw loan emaw budget emaw petrol leh diesel cess an khawn sum atanga emawa siam a ni lo. MNF sawrkar hmasain, ATL road, World Bank project contractor a ban security chhuhsak, pung awma an khawl, cheng vaibelchhe 90.69 tlingkhawm atanga siam a ni a, ZPM sum thawhchhuah atanga siam a ni lo,” a ti.