MUHCS fakmawitu minister/MLA ten an hman ve phawt kan beisei – Dr Lallianchhunga
MUHCS fakmawitu minister/MLA
ten an hman ve phawt kan beisei
– Dr Lallianchhunga
Mizoram Universal Health Care Scheme chu minister leh ruling MLA ten an fakmawi thiam hle tih Congress hruaitu Dr Lallianchhunga chuan a sawi a. A tha an ti tak tak a nih chuan fak ringawt loin, a taka hma hruai turin an beisei tih a sawi.
MPCC thupuangtu Dr Lallianchhunga chuan, enrollment fee a to avangin April 14 thlenga MUHCS-ah inziaklut mi 29472 chu a hma kum aiin mi 9000 chuanga an tam tawh zawk chungin, sawrkar kal tawhte hunlaia inziahluh tlem ber lai pawh an la pha lo tih a sawi. Congress hunlai khan mipui ban phakin, enrollment fee sang lo takin health care scheme an kalpui avangin chhungkaw nuai chuang an inziaklut a. MNF sawrkarin enrollment fee a tihsan hret hret hnuah kum 2022- 2023 chhunga inziaklut chu nasa taka tlahniamin, a hma kum 2021 October -2022 March-a inziaklut 87695 chu 2022- 2023 ah chuan 39505 an ni a. Hei hian enrollment fee tihsan chu mipuiin kan zo lo tih a lantir tih a sawi a ni.
MUHCS-a inziahluhna man a tam avangin kohhran hrang hrangin an member-te tanpui tura an pen chhuah a ngai ta, tiin, ZPM sawrkar tan a zahthlak zawkah an ngai tih a sawi a. Mipui tam zawk inziaklut tura a duh tak tak chuan mipui nawlpui ban phakin enrollment fee a ti hniam mai tur ni ah an ngai a; sawrkar atanga hlawh la ve lo chhungkua in MUHCS hi chhawr thei se tih chu Congress party duh ber a ni tih a sawi.
“MUHCS hi a tha hle nia ZPM minister-ten an ngai a nih chuan, zawm ve nghal se. MUHCS-a inziaklut tam takin empanelled hospital-a khum an chan loh avanga MUHCS la zawm thei lo private hospital-a sum tam tak senga an inenkawl a ngaih lai a, minister leh MLA dangten an duh duh hospital-a an damlo inenkawlna senso zawng zawng an bill thei a; tawngkam thiam taka MUHCS hi fak ringawt loin, a taka hma hruai turin minister-te kan beisei ni,” Dr Lallianchhunga hian a ti.
MUHCS 2.0 ah contribution pe tha ber sawrkar hnathawkten an duhna hospital an pan thei ta lo leh, an thatlai hun sawrkar tana theihtawp chhuahtu pensioner-ten an mamawh health security tha ZPM sawrkarin a siamsak thei ta lo chu, ngaihtuah tha leh turin an ngensak tih a sawi a ni.
Mizorama damdawi in kan neih that tak tak, phai lam hospital thate el pha khawp private hospital lian kan neihte leh sawrkarin inremna an la siam theih loh avangin damlo tam tak, Civil Hospital Aizawl, ZMC leh Synod Hospital-a khum chang lo leh state pawn kal thei loten MUHCS an hman tangkai theih loh phah bawk tih MPCC thupuangtu hian sawiin, “ZPM sawrkar hian Mizorama private hospital kan neih thatte thlimin, duhsakna tinreng nen state pawna private hospital-te inremna a siampui a. State pawnah nasa takin sum a luan chhuah phah a, Mizoramah sum leng vak a tihtlem phah. Hetianga hnamdang hospital a duhsak zawk avangin tun thlengin Mizorama private hospital tha tak tak, damlo tam takin damna duha an pan thinte chu MUHCS zawm thei loin siam an ni a, a tuartu chu mipui an ni,” a ti.
MUHCS chu sumdawng rilru pu loa kalpui turin sawrkar an ngen tih a sawi a. Mipui tan hamthatna scheme (welfare scheme) a nihna ang taka kalpui turin an beisei tih a sawi bawk.