Thingkung kit tlem thei ang bera kawng zauh dan dap turin phut

Lammual chhehvela hmasawnna hna thawh tur leh kawngpui zauh turah thingkung awm sa kit tlem thei ang bera hma lak dan dap an phut tih Mizoram Transformation Movement chuan an sawi.
Mizoram Transformation Movement (MTM) thuchhuak chuan, Assam Rifles chhuahsan Lammual chhehvela thingkung 169 kih tura tih a ni chu pawi a tih thu a sawi a. Heng thing hi kit loa hum hram dan zawn a pawimawh nia a hriat thu a sawi.
Lammual leh Pachhunga University College chu boruak thianghlim min petu, ‘Aizawl Chuap’ an ni, tiin, helaia thing heti zat kit tur hian Environmental Impact Assessment leh Environment Damage Mitigation tih a ni em, tih an zawt a. Thing hi kih an nih chuan NPV pek ve tur a nih avangin chu chu chhut a ni em tih sawrkarin puangzar thei se tih a sawi a ni.
Thing kih tur thenkhat hi ‘heritage site’ leh ‘protected area’ a awm an ni tih a sawi a. ‘Heng thing upa tak tak kit tur hian state sawrkar-a EF&CC department bakah National Monument Authority emaw state-level Heritage Conservation Committee atangin phalna lak a ngai thin a; chu chu lak a ni em,?’ a ti.
Heng thing kit tur hian Supreme Court thupek angin, a aiawh tur phunna – compensatory afforestation siam a ni em, tih zawtin, siam a nih chuan siamna hmun leh ruahmanna mipui hriattir se, tih a sawi bawk.
‘Kawngpui zauh hi thil pawimawh leh tul tak ni mah se, heng thing upa, lian leh hlu tak tak hi kit lo hian kawng zauh dan zawn a ni em? Ngaihtuahna hmang tha lehin, thingkung kit tam lo zawnga hmalak dan tur kawng zawn hram nise,’ a ti.
MTM chuan hmasawnna awm chu a pawimawhin a tul hlea a hriat laiin, Aizawl laili lai taka thing lian tha tak tak chu an hlu hle in a hria tih thuchhuah hian a sawi a. Ram dang leh hmun dang tam taka an tih thin angin, hmasawnna pawh heng thing zuah chung hian kalpui ngei nise tih chu mipui duh dan nia an hriat thu a sawi.
Thuneituten AR chhuahsan rama project pawimawh tak, ‘Upgradation and widening of main road at AR area Aizawl’ kalpui mek chu fim taka ngaihtuah tha leh tur leh, thing hi a tlem thei ang ber kit a, thing lian leh hlu tak tak phei chu ‘heritage tree’ a ngaia zuah tura ruahmanna siam ngei turin an phutin an beisei tih a sawi a ni.