4-lane laih zawh hma in ILP Cell leh police check gate ruahman fel duh

Sub Hqrs YMA Kolasib chuan four lane laih zawh hma ngeiin Mizoram sawrkarin ramri bulah ILP Cell leh Police Check Gate tur ruahman fel se an duh tih an sawi.
Sub Hqrs YMA Kolasib Conference vawi 8-na chu Thawhlehni zan atang khan Kolasib-ah neih a ni a, Nilaini khan ro relin YMA khawih agenda pali leh sawrkar khawih agenda pariat an pass.
YMA khawih thil – ‘Khawhar Ina hla sak tur hi a bu-in Central YMA-in buatsaih rawh se, ‘Central YMA, Sub-Hqrs YMA, Group leh Branch ten letter head inangtlanga kan hman theihnan hma lak ni rawh se’, ‘Sub-Hqrs YMA huamchhunga kan lui neihte humhalh ni rawh se’ tih leh agenda dang lut chu an pass.
Sawrkar khawih agenda – ‘Mizoram tribal list ennawn ni rawh se’, ‘Rel Station pawh turin Sakawrhmuituai Group YMA huamchhung atangin kawng thar siam dan ngaihtuah ni rawh se’, ‘Serkhan to Bagha Road siam that a nih theihnan Sub Hqrs YMA Kolasib-in hma min lakpui rawh se’, ‘Sihphir to Kawnpui (Sairang peng) tlangkawng hi double lane tura hmalak ni rawh se’, ‘Sawrkarin ILP a kalpui mek hi kimchang leh khauh zawka hman a nih theihnan sawrkarah thlen ni rawh se’, ‘Sub-Hqrs. YMA huamchhunga ramri check gate kan neihna hmun khuaah, bazar ni-in ILP ngawrh zawka check thin ni rawh se’, ‘ILP Cell leh Police Check Gate hmunhma tur ramri hrul Vairengte ah four lane kawngpui laih zawh hma ngeiin Mizoram sawrkarin ruahman fel rawh se’ tih pass a ni bawk.
Rorel zawh hian chawhnu lamah Central YMA hruaitute kaihhruaiin kum 2026- 2028 inkar chhunga hruaitu thar thlan a ni a, zaninah palai thlahna hun hman niin, New Diakkawn tlangval, NIT Silchar asssociate professor Dr Samuel Lalthazuala Rokhum leh Sub Hqrs YMA huamchhunga fa nei tamte hnenah chawimawina leh lawmpuina thilpek hlan a ni.
Sub-Hqrs YMA Kolasib hnuaiah hian Group YMA 5 awmin branch hi 91 an awm a. Conference-ah hian rorel hunah palai 385 an tel a ni.