MNF-in sawrkarna siam inbeisei

Aizawl Municipal Corporation inthlan neih zawh takah sawrkar siam ngei an inbeisei tih MNF party chuan an sawi.
MNF Gen. Hqrs. thuchhuak chuan, tluang taka AMC inthlan neih zawh takah mipui chanvo duhthlanna lantira vote thlakte chungah leh, a bikin duhsakna nena MNF candidate vote-tute chungah lawmthu an sawi tih a sawi a ni. MNF candidate-te tana theihtawp chhuahtu party mipui leh neutral atanga thahnem ngaihpuitu, Aizawl chhung leh pawna tha thlah loa thawktute chungah pawh an lawm tih a sawi bawk.
Hah taka inthlan buaipuitute chungah an lawm hle laiin, vote a tla tlem erawh, democracy rama mipuiin kan duh kan lantirna kawnga thawkchhuak kan tlem chu sawrkar hlawhchhamna kawng khatah an ngai a. Mipui hriat tur puanzar leh inzirtir kawnga tih tur tih tawk loh vangah an ngai tih a sawi a ni.
‘Vote nei tura inngai, AMC electoral roll 2026-a awm lo, vote thlak tura kal, hawihai ta engemawzat awm an awm a. 61.14% chauh vote thlak kan ni hian a bak vote thlaklo 38.86% duhthlanna ai a awh dawn tihna a ni a, a huapkim tawk lo hle in kan hria. Vote thlaktu zinga 50% chunglam thlanchhuah chauhin Aizawl khawpui enkawl hna an thawk dawn tihna a ni a, duhthusamin a kal a kimlo hle ah kan ngai,’ a ti.
Venhimna lam thawktu, state danga duty mek mi tam tak vote thlak thei loa siam an ni tih MNF thuchhuah hian sawiin, rim taka ram himna atana thawktute dikna chanvo rahbehna leh democracy kalphung zahlohnaah an ngai a, hetiang hi thleng nawn tawh lo se an duh takzet tih a sawi a ni.
Tluang tak leh him taka vote chhiar a nih ngei an beisei thu leh, vote tla chhe tak karah Pathian leh mipui duhsakna changin sawrkarna siam ngei an inbeisei thu sawiin, mipui lalna leh zalenna AMC din a nih ngei an beisei tih a sawi a ni.